PËRPLASJE DHE AKUZA/ "ËSHTË PERSEKUTOR" - PRESIDENTI NISHANI HEDH NË GJYQ VISAR ZHITIN
Presidenti
Bujar Nishani ka hedhur në gjyq shkrimtarin Visar Zhiti. Shkak për këtë është bërë përplasja mes tyre dhe debati publik. Në gjykatë, Nishani e ka paditur Zhitin për shkaktim dëmi ndaj figurës së tij. Media ka raportuar ditën e djeshme se padia ndaj shkrimtarit mban numrin 9994. Ende nuk dihen detajet e e çështjes, së çfarë kërkon presidenti, cila ka qenë deklaratë konkrete për shkak të së cilës, ai e ka paditur e as se çafrë kërkon në këmbim.
Përplasja nisi kur presidenti refuzoi të dekretonte Zhitin për postin e ambasadorit pranë selisë së shenjtë në Vatikan.
Shkrimtari dhe ish i përndjekuri politik Visar Zhiti është aktualisht i Ngarkuari me Punë i Shqipërisë pranë Selisë së Shenjtë. Dy vite më parë, Nishani refuzoi dekretimin e tij si ambasador i Shqipërisë në Vatikan. Atë kohë, figura të rëndësishme të së djathtës, si Jozefina Topalli, dolën përkrah Zhitit.
Megjithëse vinin nga e njëjta parti, Zhiti kishte qenë ministër kulture i qeverisë Berisha, Nishani president, e hodhi poshtë propozimin e qeverisë Rama.
Në muajin mars, debati u rihap. Në kohën që ministër i Brendshëm po bëhej Fatmir Xhafaj, përmes një letre të hapur, botuar në Gazetën Shqiptare, Visar Zhiti kritikoi presidentin Nishani, duke e quajtur një ' hiç president', ndërsa ky i fundit deklaroi në media se "i kanë ardhur mesazhe nga ish- të përndjekur politikë kundra Visar Zhitit dhe rolit të tij në burgje".
"Kur u bë publik propozimi i kryeministrit Rama për të emëruar Zhitin ambasador në Selinë e Shenjtë, unë mora mesazhe dhe dëshmi nga ish- i përndjekuri politik P. V., i cili e akuzonte Zhitin si bashkëpunëtor të administratës së burgut të Spaçit", pat deklaruar Nishani.
Deklaratat e presidentit nuk kaluan në heshtje pasi Zhiti në një reagim të dytë për "GSh" tha se presidenti duhej të fliste me prova e me dosje, duke qenë se si kryetar shteti, i kishte të gjitha mundësitë.
"( Presidenti) flet për diktaturën e dikurshme, kur është vegël e saj e mbetur, flet për të persekutuarit, kur vetë është persekutor, edhe pse i paaftë", thoshte Zhiti më 20 mars. "E përsëris, unë pata fatin dhe fuqinë që ta refuzoj bashkëpunimin me të keqen, por presidenti nuk duhet të flasë si kafeneve apo studiove klanore, e porosis të ketë kujdes, se një herë i shtypën njerëzit, i thyen, i bënë vegla të tyre dhe tani ua përflasin - u bëjnë shantazh e i shpërdorojnë", shtonte ai.
Atë kohë, GSH, publikoi dokumente që tregonin se Zhiti pati refuzuar të bashkëpunonte me Sigurimin e Shtetit në burgje.