Basha: Largoni thithëlopat me votë, shkatërruan vendin
Kreu i PD në Sarandë dhe Vlorë: Nuk ka më pazare në kurriz të shqiptarëve "Debat në Sheshin e Flamurit, më kthe përgjigje mo burrë"
Kreu i Partisë Demokratike, Lulzim Basha hapi dje fushatën elektorale në Sarandë dhe Vlorë, duke ftuar shqiptarët që me votë të largojnë thithëlopat që e shkatërruan vendin për 26 vite me radhë. Para mbështetësve të opozitës, z. Basha u dha një përgjigje të prerë zërave për një koalicion të mundshëm paszgjedhor me PS- në. Basha garantoi qytetarët se besimin e tyre nuk e kthen në pazar, ndërsa kishte një mesazh edhe për Lëvizjen Socialiste për Integrim. Basha e konsideroi LSI- në si një forcë "matrapaze" që "blen këlyshë dhe shet qen", por sipas tij ajo kohë ka mbaruar. "Republika e re do të triumfojë në 25 qershor. Ne nuk bëjmë pazar me kauzën e qytetarëve shqiptarë, me asnjë nga thithëlopat e republikës së vjetër. Rama do të japë llogari për dështimin total. Edhe LSI- ja ta ketë të qartë se koha e matrapazëve në politikë që shkojnë sa andejkëndej, shit këlyshë e bli qen, merr fund në 25 qershor. Nuk ka më! Ndaj të gjithë ju votues që jeni tunduar me teserat e partive të pazarit që jua kanë dhënë për t'ju mbajtur peng, dijeni se votat për këto parti janë vota të hedhura në det, kurrë më pazari ' bli këlyshë e shit qen' nuk do ecë me PD- në. Mos harroni, ne jemi të bashkuar, e gjithë opozita është e bashkuar, ata janë të përçarë. Ne e dimë se ku po shkojmë, tani është koha juaj të bashkoheni", - deklaroi z. Basha. Kryetari i opozitës premtoi se me reformën kushtetuese që do të bëhet nga parlamenti i ri, qytetarët do mund të shkarkojnë deputetë të cilët nuk u përgjigjen. Për këtë ai ofroi një model amerikan. "Republika e re është vendi ku qytetarët kanë në duar politikën dhe jo politika ka në dorë qytetarët. Kjo fillon me reformën kushtetuese, që sot është pjesë e marrëveshjes politike që i hapi rrugë pjesëmarrjes së opozitës në zgjedhje, dhe me këtë reformë kushtetuese ju premtoj se deputetët që këtej e tutje nuk do t'i zgjedhin kryetarët e partive, por do t'i zgjidhni ju, qytetarët, dhe sa më takon mua, në parlamentin e ardhshëm ata deputetë ju do të keni mundësinë jo vetëm t'i zgjidhni, por edhe t'i shkarkoni përpara fundit të mandatit sipas sistemit ' Recall' të SHBA. Ju do të keni pushtetin për të shkarkuar deputetët që nuk
ju përgjigjen, që shkojnë pas interesit të vet dhe jo interesit tuaj", - deklaroi ai. Kreu i PD- së përmendi se prej pesë ditësh, kryeministri Edi Rama nuk i kthen përgjigje
ftesës për debat publik. "Po më kthe një përgjigje, mor burrë i dheut. Eja në debat, mos ki frikë! Eja, sepse debati është kulturë demokratike. Unë e di pse ke frikë. E
di se nuk ke asnjë mënyrë për t'u shpjeguar shqiptarëve për atë që nuk bëre. Ajo që the se ' nuk kisha kohë dhe nuk kisha para' nuk është e vërtetë.
Pak kohë kishte për të bërë ' Lungomaren' dhe nuk e bëre. 4 vite për ' Lungomaren'! Dy vjet m'u deshën për Rrugën e Kombit", - deklaroi z. Basha.