Bien shitjet me pakicë, rënie më të ndjeshme ushqimet dhe pijet
Raporti i INSTAT për tregtinë me pakicë
Tregtia
me pakicë ka shënuar rënie në tremujorin e parë të vitit. Sipas të dhënave të INSTAT- it, në tremujorin e parë 2017, indeksi i volumit të shitjeve në tregtinë me pakicë është rritur 2,5%, krahasuar me të njëjtën periudhë të vitit 2016. Ngadalësimi ka ardhur nga rënia e volumit të shitjeve në grupin "Ushqime, pije, duhan në njësi tregtare jo të specializuara dhe të specializuara". Ky është niveli më i ulët i rritjes vjetore, i konstatuar të paktën që nga tremujori i parë 2016. Në tremujorin e parë 2016 indeksi i volumit të shitjeve me pakicë ishte rritur me 4.2% me bazë vjetore, në të dytin me 6.7%, në të tretin 6.7%, dhe në tremujorin e katërt 2016 kërceu me 8.2%. Kjo tendencë është në linjë me ecurinë e TVSH- së së brendshme, që ka qenë e dobët, madje edhe negative në muajt e parë të këtij viti, sipas të dhënave të mëparshme të publikuara nga Ministria e Financave. Të ardhurat nga TVSH- ja e brendshme për tremujorin e parë u rritën me 4.5% me bazë vjetore, ndërsa në mars zgjerimi vjetor ishte vetëm 0.1%. Në tremujorin e parë 2016, të ardhurat nga TVSHja e brendshme ishin rritur me 27.5%. Sipas INSTAT- it, në tregtinë me pakicë, pa përfshirë këtu tregtinë me pakicë të hidrokarbureve, indeksi i volumit të shitjeve ka pësuar një rritje prej 2%, kundrejt të njëjtit tremujor të vitit të mëparshëm. Indeksi i volumit të shitjeve, për grupin "Produkte joushqimore në njësi tregtare të specializuara dhe jo të specializuara ( përjashtuar tregtinë me pakicë të hidrokarbureve në njësi tregtare të specializuara)", është rritur në nivelin 3,3%, kundrejt së njëjtës periudhë të vitit paraardhës, duke dhënë në këtë tremujor ndikimin kryesor në indeksin e volumit të shitjeve në tregtinë me pakicë.