"Balena Blu", ja si i shpëtoi vdekjes 13- vjeçarja
Nxënësja e klasës së 7- të u zbulua pas urdhrit të kuratorit. DAR, apel prindërve: Kontrolloni fëmijët kur janë në internet E mitura arriti nivelin 33 të lojës horror, kishte 10 ditë pa ngrënë
Loja vdekjeprurëse "Balena Blu", e cila u ka marrë jetën qindra fëmijëve në Rusi, por edhe në vende të tjera të Europës, po gjen terren edhe në Shqipëri. Një vajzë 13- vjeçare nga fshati Labovë e Kryqit në Gjirokastër ka rënë pre e kësaj loje të rrezikshme. E mitura, nxënëse e shkollës "Koto Hoxhi" të qytetitmuze, ka arritur në nivelin 33 të lojës virtuale ( nga 50 nivele në total), që luhet në celularët smartphone, duke i shpëtuar fundit tragjik. Rasti në fjalë është zbuluar, pasi ka qenë vetë nxënësja që u ka treguar shoqeve dhe shokëve për lojën. Menjëherë mësuesit e shkollës kanë njoftuar Drejtorinë Arsimore Rajonale të Gjirokastrës në lidhje me këtë rast. Ndërkaq, krerët e këtij institucioni dhe psikologët kanë marrë masa për trajtimin e vajzës. Hapi i parë ka qenë denoncimi në Polici pranë zyrës së krimit kibernetik dhe shkëputja e 13- vjeçares nga të gjitha mjetet e kontaktit me internetin. Burime zyrtare nga DAR dje bënë me dije për "Gazeta Shqiptare" se e mitura rrjedh nga një familje me prindër me probleme psikologjike, dhe kjo është një ndër arsyet e mospikasjes së ndryshimit të saj në sjellje. Por, rreziku i rënies në kthetrat e kësaj loje është i pranishëm në çdo familje, pavarësisht gjendjes së tyre sociale dhe ekonomike. Ky është rasti i parë, i bërë publik në Gjirokastër. Ndërsa, dyshohet se pre e lojës së rrezikshme "Balena Blu" mund të jenë bërë edhe fëmijë të tjerë. Sipas burimeve të mësipërme, 13- vjeçarja, nxënëse në klasën e 7- të, që vjen nga zonat rurale, ka marrë urdhër nga kuratori për të njoftuar shokët e klasës që të shkarkojnë lojën "Balena Blu". Më pas ata e kanë referuar te mësuesja kujdestare. Vetë vajza ka deklaruar se nuk ka përdorur telefonin e saj, pasi nuk ka telefon. Ajo ka treguar se një vajzë, së cilës i di vetëm emrin, i ka ofruar telefonin e vet, nga ku merrte instruksione nga kuratori në pushimin e gjatë. E mitura kishte arritur deri aty sa lëndonte veten, ndërsa kishte 10 ditë pa ngrënë e pa pirë. Nisur nga rasti në fjalë, DAR Gjirokastër u ka bërë apel prindërve që të kontrollojnë fëmijët e tyre gjatë kohës që
kalojnë në internet.
LOJA VRASËSE
"Balena Blu" ka si qëllim t'i fusë fëmijët në kurthin që i shpie deri në vetëvrasje. Për shkak të kësaj loje janë vetëvrarë qindra fëmijë në Rusi ( nga ku mendohet se ka lindur kjo lojë), por edhe në Itali, Mal të Zi, Maqedoni etj. Ekspertët kanë paralajmëruar se edhe Shqipëria mund të jetë "tabelë qitjeje" e kuratorëve të "Balenës Blu". Kuratori është njeriu që kontakton fëmijët përmes rrjeteve sociale si: "Facebook", "Instagram" apo çfarëdo rrjeti social, dhe u kërkon të luajnë një lojë bashkë. Por, mund të ndodhë që vetë fëmija, për shkak të kuriozitetit, ta shkarkojë si aplikacion "Balenën Blu" ( nga "Play Store") në telefonin e tij dhe të fillojë të luajë. Në momentin e parë kuratori i kërkon
fëmijës të dhënat e sakta: emër, mbiemër, vendbanim, fotografi. Më pas nisin rregullat e njëpasnjëshme të lojës. Çdo ditë, për 50 ditë me radhë, nga një rregull i ri, të cilin fëmija duhet ta zbatojë me përpikëri, duke ia vërtetuar kuratorit me foto, deri në rregullin final, që është të vrasë veten duke u hedhur nga tarraca e një pallati të lartë.
Rregullat janë të tilla si: Fëmija të ikë nga orët e mësimit; të shkojë vonë në shtëpi; të shkruajë një letër kërcënuese dhe ta fusë poshtë derës së një shtëpie; të mos komunikojë me njeri për ditë me radhë; të presë ( dëmtojë) veten me thikë ( zakonisht në parakrah); të zgjohet në orën 4: 20 të mëngjesit dhe të shikojë videot me persona që vrasin veten në mënyra të tmerrshme ( videot i dërgon kuratori); të dëgjojë muzikë psikedilike ( depresive), të cilën gjithashtu ia dërgon kuratori; të mos ushqehet rregullisht; të mos konsumojë ujë, lëngje etj. Pra si
fillim, kuratori përpiqet që të nxisë te fëmijët sjellje devijante ( të lërë orët e mësimit, të shkojë vonë në shtëpi, të mos shkojë fare në mësim), në mënyrë që të krijohen konflikte mes fëmijës dhe prindërve. Fëmija do të fillojë të ndihet vetëm, i pakuptuar, dhe mundësia do të jetë shumë e vogël që t'iu tregojë prindërve atë që po i ndodh. Më pas, mungesa e gjumit, e ushqimit, e komunikimit me të tjerët, shikimi i videove të tmerrshme e të frikshme do ta fusin fëmijën në një gjendje depresioni dhe ai do t'i bindet urdhrit final të kuratorit për të vrarë
veten, pasi nuk do të shohë rrugëzgjidhje tjetër. Gjithashtu, kuratori e kërcënon fëmijën se do ta vrasë atë dhe familjen e tij nëse tërhiqet nga loja apo i tregon dikujt. Kështu fëmija futet në një kurth, nga i cili s'di dhe s'mundet të dalë i vetëm.
NJOFTIM