BE: Një hap para drejt implementimit të vetingut
Votohen 7 anëtarët e Kolegjit të Apelimit, të përzgjedhurit që i kontestoi PD Kush është treshja në krye të drejtësisë
Komisioni ad hoc me 6 anëtarë për përzgjedhjen e emrave për krijimin e institucioneve të vetingut votoi dje, 7 anëtarët e Kolegjit të Posaçëm të Apelimit. Në një votim të fshehtë, komisioni ad hoc me 6 anëtarë votoi kandidatët që do të jenë pjesë e Kolegjit të Posaçëm të Apelimit, një nga tre institucionet që do të bëjë procesin e rivlerësimit ( vetingut) të gjyqtarëve dhe prokurorëve shqiptarë. Pas votimit elektronik, 6 kandidatët e shpallur fitues janë: Ardian Hajdari, Natasha Mulaj, Sokol Çomo, Ina Rama, Luan Daci dhe Albana Shtylla. Ndërsa gjyqtari i 7- të fitues për Kolegjin e Apelimit, pas shortit me gogla, rezultoi Rezarta Schutz. Pas shortit tjetër me gogla dolën edhe dy fituesit për anëtarë zëvendësues në Kolegj. Zëvendësues i parë i këtij organi do të jetë Mimoza Tasi, ndërsa zëvendësues i dytë do të jetë Etleva Paplekaj. Procedurat e votimit u drejtuan nga anëtarja e komisionit ad hoc Vasilika Hysi dhe sekretarja teknike. Të pranishëm në votim ishin edhe ambasadorët e SHBA- ve dhe BE- së, Donald Lu dhe Romana Vlahutin, si dhe përfaqësues të misioneve ndërkombëtare, mjaft të angazhuar gjatë procesit të reformës në drejtësi, në Shqipëri. 9 emrat e përzgjedhur pritet që brenda 10 ditësh t'i kalojnë për miratim Kuvendit. Lista e kandidatëve votohet në bllok, dhe kërkon shumicë të cilësuar, 3/ 5 e votave të të gjithë anëtarëve të parlamentit. Kolegji i Posaçëm i Apelimit, bashkë me Komisionin e Pavarur të Kualifikimit dhe komisionerët publikë, përbëjnë tre institucionet që do të realizojnë procesin e rivlerësimit të gjyqtarëve dhe prokurorëve. Gjyqtarët e Kolegjit të Apelimit kanë një
mandat 9- vjeçar. Pas kësaj, Kuvendi brenda 10 ditëve miraton listën e kandidatëve në bllok, me 3/ 5 e votave të të gjithë anëtarëve të tij. Bashkimi Europian e përshëndeti përzgjedhjen e anëtarëve të Kolegjit të Apelimit. Përmes një postimi në rrjetin social "Twitter", delegacioni i BE- së në vendin tonë shprehet se Shqipëria ka bërë një hap para drejt
implementimit të vetingut. Ish- kryeprokurorja, ishzv. ministri dhe ish- anëtarja e KQZ- së, të kontestuar nga opozita, janë pjesë në Kolegjin e Apelimit, e konsideruar ndryshe si gjykata e Apelit të Vetingut. Do të jetë kjo strukturë që do të shqyrtojë ankesat e njerëzve të drejtësisë të cilët në shkallën e parë preken nga vetingu dhe pezullohen
ose përjashtohen nga sistemi. Edhe dita e enjte do të jetë intensive për sa i përket vetingut, pasi do të përzgjidhen 12 anëtarët e komisionit të vetingut ose, thënë ndryshe, gjykatës së shkallës së parë në këtë proces. Me të njëjtën procedurë të fshehtë votimi do të përzgjidhen 2 komisionerët publikë ekuivalentë me prokurorë. Do votohen
gjithashtu edhe 4 zëvendësues të tyre. Lista me 27 anëtarë në të gjitha këto struktura duhet të votohet në Kuvend, në një seancë të jashtëzakonshme plenare me 84 vota. Në rast se nuk arrihen këto vota, procesi i përzgjedhjes rihapet nga e para. Por këtë radhë lista finale duhet të rrëzohet me 93 vota deputetësh.