Partizani rikthen Prognin, lojtari: Vij për titullin!
Pas largimit të Ramadanit e Cetkoviçit, të kuqtë risjellin në shtëpi lojtarin e akademisë Tropojani është aktivizuar së fundmi te Teuta
Gerhard Progni do të jetë pjesë e Partizan it, teksa futbollisti është prezantuar dhe ka thënë fjalët e para pas rikthimit të tij në kryeqytet. Mesfushori anësor ishte pjesë e Teutës në gjashtë muajt e fundit, ndërkohë që tanimë do të vihet nën urdhrat e trajnerit Starova. Lajmi u bë i ditur nga vetë klubi i kuq, që shkruan: "Klubi njofton arritjen e marrëveshjes me Gerhard Prognin. Sulmuesi i njohur, i cili sezonin e kaluar ishte pjesë e Teutës, ka nënshkruar një kontratë 2- vjeçare me opsion rinovimi edhe për një tjetër sezon me fanellën e 15- të herë kampionëve të vendit. Progni rikthehet në familjen e kuqe, klub nga i cili është formuar si lojtar, duke u aktivizuar edhe për katër sezone dhe qenë pjesë e skuadrës deri në sezonin 2008. Sulmuesi do të mbajë të veshur fanellën me numër 77".
Vetë lojtari është shprehur shumë i lumtur për rikthimin e tij në klubin amë, ndërsa shpreson se do të japë kontributin e nevojshëm për ta rikthyer ekipin e kuq te titulli kampion, një titull që mungon tashmë prej 24 vitesh te kryeqytetasit. "Vij te Partizani për të fituar titullin kampion. Rikthehem në klubin ku jam formuar si lojtar profesionist dhe te Partizani është një rikthim në shtëpi dhe kënaqësi e madhe të vesh përsëri fanellën e kuqe. Besoj që këtë sezon t'u dhurojmë tifozëve tanë të mrekullueshëm trofeun, të cilin e presin prej kohësh. Shpresoj se ky do të jetë viti i Partizanit dhe premtoj të jap maksimumin, për të realizuar objektivat që klubi ka në këtë sezon futbollistik". 30- vjeçari i lindur në Tropojë ka një eksperiencë të gjatë në futbollin shqiptar. Sezonin e fundit ai e kaloi pjesërisht në Azerbajxhan me Ziran dhe pjesërisht me Teutën, skuadër që e ndihmoi të siguronte mbijetesën në Kategorinë Superiore. Progni ka fituar dy tituj me Skënderbeun në sezonet 2014- 2015 dhe 2015- 2016, ndërsa me fanellën e Kukësit është aktivizuar në dy sezonet paraardhëse. Progni numëron gjithashtu edhe 3 vite eksperiencë me Flamurtarin dhe një me Dinamon e Besën.