Vrasja e Artan Cukut, në kërkim kushëriri i Mikel Shallarit
Zyrtari i lartë i policisë drejt Zvicrës, kërkon të dhëna për 24- vjeçarin Bashkëpunoi në krim, dyshohet se fshehu armët
Pas arrestimit të Mikel Shallarit si i dyshuari kryesor që kreu ekzekutimin e komisarit Artan Cuku, policia ka shpallur në kërkim edhe një kushëririn e tij. Burime pranë uniformave blu thanë dje për "Gazeta Shqiptare", se me urdhër të Prokurorisë së Krimeve të Rënda është shpallur në kërkim kushëriri i Shallarit, pasi ka dyshime të forta se ai ka bashkëpunuar për vrasjen e Cukut, duke i dhënë informacione 24- vjeçarit për lëvizjet e ish- drejtorit të Policisë së Vlorës. Ndonëse për shkak të hetimit, policia nuk bën me dije identitetin e tij, burimet thanë se ai ka informuar 24- vjeçarin nga Kuçova për të gjitha lëvizjet e ishoficerit të lartë të policisë Artan Cuku, deri në momentin që ai është futur në hyrjen e pallatit ku banonte, ku edhe u qëllua për vdekje. Të njëjtat burime shtuan më tej, se identifikimi i këtij personi është zbuluar në bazë të metodave specifike të hetimit, pavarësisht se i dyshuari Mikel Shallari vijon të mohojë autorësinë e krimit duke mos bashkëpunuar kështu me drejtësinë. Ndërkaq, burimet thanë më tej se personi që dyshohet të ketë fshehur edhe armët e krimit mund të jetë edhe kushëriri i 24- vjeçarit Mikel Shallari. Ndërsa, për hetuesit ngelen ende enigmë personat që kanë porositur vrasjen e Cukut. Prej ditësh, Mikel Shallari vijon të mos pranojë bashkëpunimin e tij me drejtësinë, duke mos treguar edhe emrat e personave që i kanë kërkuar të kryejë aktin e rëndë. I riu nga Kuçova, i cili prej disa muajsh jetonte në kryeqytet së bashku me familjen e tij, ka qenë i arrestuar në Zvicër për shpërndarje të lëndëve narkotike, dhe të dhënat e ardhura nga Interpol Berna bënë të mundur identifikimin e tij. Përfshirja e tij në ngjarje u zbulua pas analizave të ADN- së nga bluza që ai hodhi në një kosh mbeturinash, pasi kreu vrasjen e
Ndërkaq, burimet e lartpërmendura bënë dje me dije se një zyrtar i lartë i Policisë së Shtetit, i cili është duke u marrë me hetimin e çështjes në fjalë, në bashkëpunim edhe me Prokurorinë e Krimeve të Rënda, ka udhëtuar drejt Zvicrës duke u kërkuar autoriteteve të huaja që të sigurojnë sa më shumë të dhëna për Mikel Shallarin. Mësohet se të dhënat që do t'u kërkohen autoriteteve zvicerane kanë të bëjnë me kontaktet që 24vjeçari ka pasur në qelitë e burgut me shtetas të tjerë shqiptarë, pasi dyshohet se ai dhe porositësi i vrasjes së Cukut mund të jenë njohur në burg. Ky lloj informacioni pritet të jetë tepër i rëndësishëm për hetuesit, për të zbardhur sa më shumë detaje rreth motivit të krimit dhe për identifikimin e porositësve. Ndonëse ndaj tij është ngritur akuza e "Gjakmarrjes", e kryer në bashkëpunim, prokuroria ka të hapura edhe pista të tjera, si ajo për shkak të detyrës që Cuku ka mbajtur në disa qytete të ndryshme të vendit, e kryesisht në Vlorë, si dhe ajo për ndonjë konflikt të mundshëm që ai mund të ketë pasur gjatë kohës që drejtonte një shoqëri ruajtjeje fizike.