Vetingu bllokon procesin gjyqësor për "Velierën"
Avokatja e Shoqërisë Civile, Mirela Jorgo: Po punohet me ritme të shpejta edhe në zonën arkeologjike A Shkak, mungesa e tre gjyqtarëve dhe nxjerrja jashtë loje e KLD- së
Vetingu mban pezull procesin gjyqësor për projektin "Veliera" në Durrës, investim ky që kap vlerën e 6 milionë dollarëve dhe që mes kontestimesh të shumta po shkon drejt përfundimit. E ndërsa procesi ka stopuar, pasi nuk plotësohet numri tre i gjyqtarëve, punimet për ndërtimin e "Velierës" po vijojnë me ritme të shpejta. Seanca e fundit gjyqësore është mbajtur në 21 maj dhe nuk dihet kur do të fillojë sërish shqyrtimi i kësaj çështjeje. Shoqëria Civile, e përfaqësuar nga avokatja Mirela Jorgo, ka ngritur shqetësimin se pezullimi i procesit gjyqësor në Gjykatën e Shkallës së Parë në Durrës po favorizon bashkinë që të përfundojë projektin. Sipas Jorgos, bashkia po shkel vendimin e gjykatës, pasi po punohet në zonën arkeologjike A. Avokatja deklaroi dje për "GSH", se po luhen të gjitha makinacionet e pushtetit për të përfunduar projektin, madje gjyqtarët nuk marrin përsipër të gjykojnë procesin "Veliera", pas dorëheqjes së gjyqtares Meriban Mullaj. "Dy gjyqtarë janë kërkuar të vijnë nga KLD- ja nga gjyqtari i çështjes, por me hyrjen në fuqi të ligjit të vetingut, KLD- ja është shpërbërë, dhe duhet të jenë Këshilli i Lartë Gjyqësor dhe Këshilli i Lartë i Prokurorisë si dy institucione kryesore, që nuk e kanë parashikuar në ligjin e vetingut këtë boshllëk. Stafi i prokurorisë dhe gjykatës nuk e plotëson me anëtarë këtë çështje. Më shqetëson fakti që ka tri vendime gjykate për masë pezullimi dhe pesë sekuestro preventive në zonën arkeologjike A, ndërsa vijojnë punimet. Agjencia e Shërbimit Arkeologjik ka nxjerrë një vendim me shkresë zyrtare për integrimin e zonës arkeologjike A me investimin që po bëhet. Ne do të insistojmë ta hedhim poshtë këtë vendim. Kishte 6 muaj që ASHA e kishte lënë pa vendim dhe ' Veliera' eci me ritme shumë të shpejta në këta muaj", - tha përfaqësuesja e Shoqërisë Civile, Mirela Jorgo. Mësohet se projekti "Veliera" po shkon drejt përfundimit. Do të jetë çështje ditësh kur ASHA do të japë verdiktin final nëse do të devijohet projekti apo nuk do të merren parasysh rrënojat arkeologjike që u zbuluan gjatë gërmimeve. Megjithëse ASHA është njohur me problemin që nga muaji janar, po e zvarrit përgjigjen pa asnjë arsye, sepse rezultatet e arkeologëve janë bërë publike disa muaj më parë. Sheshi "Veliera" është një prej investimeve madhore që po kryen Bashkia e Durrësit, për të cilin ka pasur mjaft kontestime nga ana e qytetarëve. Është Gjykata Administrative ajo që në ditët në vijim pritet të japë edhe një vendim në lidhje me ndërtimin e "Velierës" ( pjesa e sipërme e sheshit). Punimet janë të bllokuara në pjesën mbi rrugë nga kompleksi "Fly" deri te Torra Veneciane, ndërsa vijojnë me ritme të shpejta në pjesën tjetër.