Ekstradohet i dënuari me 18 vjet për vrasje
Dy
persona, një shqiptar dhe një shtetas turk, janë ekstraduar drejt vendit tonë. Bëhet fjalë për shqiptarin Fatmir Hamiti, 54 vjeç, lindur në Dukat, Vlorë, i dënuar me 18 vjet burg për veprën penale "Vrasje me dashje", si dhe shtetasin Turk Azmi Cavus i dënuar me 3 vjet e 1 muaj burg për veprat penale të "Falsifikimit të letërnjoftimeve, pasaportave apo vizave" dhe "Dhënie ndihme për kalim të paligjshëm të kufirit". Ishpolici nga Vlora, Fatmir Hamiti, u arrestua një vit më parë në Itali. Ai kërkohej nga policia e vendit tonë për vrasjen e një qytetari, të cilën e kishte kryer me armën e shërbimit. Ngjarja u shënua në vitin 1995. Pas arrestimit, ai u arratis nga burgu vetëm një vit më vonë. Ndërkaq, Policia e Venecias ka publikuar videon e arrestimit dhe fakte rreth jetës që bënte ai në Itali, pasi ishte fshehur pas identitetit Neshat Nelaj. Arrestimi i tij u bë gjatë operacionit të koduar "Kameleoni". Media italiane shkruan se ai akuzohet për vrasjen e një bashkëqytetari të tij me emrin Krenar Kalemi, më 22.06.1995 në Vlorë. Hamiti, pas një sherri, e qëlloi atë me armën e shërbimit, me 5 plumba pistolete. Në atë kohë, ai ishte punonjës në zyrën e emigrimit në Policinë e Vlorës dhe media italiane raporton se vrasja për të cilën u dënua ndodhi pranë gjykatës. Më pas, ai u bë protagonist i një arratisje spektakolare nga burgu, një vit pas krimit të kryer dhe që atëherë ka qenë në kërkim. Ndërsa, turku 53- vjeçar u ekstradua nga Rumania, pasi më datë 04.05.2014, një shtetas turk ka tentuar të kalojë pikën e kontrollit kufitar në Aeroportin "Nënë Tereza" nëpërmjet një pasaporte bullgare, e cila ka rezultuar e falsifikuar. Pas hetimit rezultoi se dokumenti ishte siguruar nga Azmi Cavushi kundrejt shumës prej 1000 GBP, i cili e ka shoqëruar edhe gjatë kalimit në aeroport.