Helmimi në mitingun e PD- së, Ushtria: Nuk ndodhi nga ndonjë lëndë luftarake
Mbi 100 qytetarë u paraqitën në spital me skuqje, djegie dhe njolla në trup Pritet përgjigjja e analizave në Gjermani
Pjesëmarrësit në mitin gun e Partisë Demokratike nuk janë helmuar nga lëndë luftarake. Në këtë konkluzion kanë dalë ekspertët kimistë të ushtrisë. Pak ditë më parë, prokuroria, e cila po vijon hetimet për të zbuluar shkakun e vërtetë të mbështetësve të Partisë Demokratike, u informua nga Ministria e Mbrojtjes lidhur me konkluzionet e arritura nga ekspertët e saj, që u përfshinë në hetimin e kësaj çështjeje. Mësohet se ata, në bazë të hetimeve të kryera kanë hedhur poshtë faktin se ndaj 146 qytetarëve mund të jetë hedhur ndonjë lëndë luftarake. Burime pranë organit të akuzës bënë me dije se ndonëse specialistët e Ministrisë së Mbrojtjes kanë përjashtuar mundësinë se helmimi mund të ketë ndodhur nga ndonjë lëndë luftarake, nuk kanë mundur të përcaktojnë lëndën që u shkaktoi shqetësime mbi 100 mbështetësve të PD- së. Kështu, në kushtet edhe kur Instituti i Mjekësisë Ligjore, nuk ka mundur të përcaktojë qartë se nga çfarë lloj lënde është shkaktuar helmimi i tyre, prokuroria është në pritje të përgjigjeve që pritet të vijnë nga Gjermania. Deri në këtë fazë të hetimeve dyshohet se djegiet e syve, skuqjet dhe marrje mendsh te qytetarët, dyshohet të ketë qenë për shkak të prozhektorëve të përdorur për ndriçim gjatë mitingut. Për këtë fakt, prokuroria bllokoi edhe disa prej këtyre prozhektorëve, për të zbardhur nëse lëndimi i qytetarëve është shkaktuar prej tyre ose jo. Kurse, administratori i firmës, pas bllokimit të prozhektorëve deklaroi para hetuesve se të gjithë prozhektorët që ndriçuan mitingun e PD- së, në nisje të fushatës elektorale për zgjedhjet e 25 qershorit, janë përdorur edhe më parë në zgjedhjet e vitit 2013, 2015, si dhe për këtë vit. Por, pavarësisht dyshimeve të ngritura, ngjarja në fjalë u referua nga policia për ndotje të ajrit, por prokuroria po heton për akuzën e "pengimit të subjekteve zgjedhore" të parashikuara në nenin 325 të Kodit Penal. Pak orë pas mitingut të PD- së, 146 qytetarë u paraqitën në spi- tal me skuqje, djegie dhe njolla, në lëkurën e qafës, në sy, duar dhe pjesë të tjera të trupit. Mes tyre ishte edhe vetë kryeopozitari Lulzim Basha.