Rama: Çudia e fushatës, përfshirja e presidentit
"Më vjen shumë zor, ndihem i sëkëlldisur kur dëgjoj ulërima e kërcënime" "Jo më Shqipëria e partive të tepsisë së pushtetit"
Kryeministri Edi Rama shigjetoi sër ish dje ish- kreun e LSI- së, Ilir Meta. Pas votimit të listës së anëtarëve të organeve të vetingut, Rama deklaroi për gazetarët jashtë Kuvendit se çudia e kësaj fushate zgjedhore është përfshirja e presidentit të zgjedhur. Ai e vlerësoi fushatën e këtyre ditëve si të qetë, si nga retorika ashtu edhe nga parandalimi i ndotjes së mjedisit. "Fushata elektorale - të gjithë qytetarët e kanë parë, të gjithë ne e shohim, - është fushata më e qetë që kur e mbaj mend unë nga pikëpamja e retorikës, mosndotjes së mjedisit. Kemi ndaluar ndotjen e mjedisit me postera, banera, flamuj, fotografi dhe lloj- lloj karagjozllëqesh që e kanë tensionuar jashtëzakonisht shumë fushatën në të shkuarën. Nga fakti që palët sigurisht thumbohen me njëra- tjetrën, sigurisht kanë idetë e tyre, polemizojnë, ka momente kur kalojnë edhe masën e jetës normale, por sigurisht brenda normalitetit të plotë. Ajo që e ka bërë fushatën të çuditshme, është futja e presidentit të zgjedhur në fushatë. Nuk dua të bëj komente për këtë, sepse fokusi ynë në këto 7 ditë të mbetura janë njerëzit, dhe ne kemi njerëzit në mendjen, zemrat e tyre, sfidën për të arritur që t'u shpjegojmë se na duhet fuqia e plotë", - deklaroi z. Rama. Po dje, gjatë mitingut të PS- së në Lezhë, z. Rama reagoi për deklaratat e kreut të Kuvendit, Ilir Meta, i cili po ashtu nga Lezha pas dhunimit të një mbështetësi të LSI- së foli për armatosje të popullsisë. Rama tha se ndihet i keqardhur dhe i sëkëlldisur kur shikon e dëgjon ulërima e kërcënime. "Unë do t'jua kthej besimin me përkushtim, me vendosmëri dhe me kurajë e kokëfortësi për t'ia dalë që, siç hapëm portën e drejtësisë, të hapim edhe portën e administratës së shtetit për qytetarët, jo më partitë e tepsisë së pushtetit. Më vjen shumë keq, shumë zor. Ndihem shumë i sëkëlldisur kur shikoj gjëra që nuk do donim t'i shihnim, kur dëgjoj gjëra që shqiptarët nuk do donin t'i dëgjonin më. Çirrje, ulërima, kërcënime... Por Shqipëria që duam, nuk është Shqipëria e ulërimave, kërcënimeve dhe e partive të tepsisë së pushtetit. Duam shtet për çdo shqiptar, për çdo prind e për çdo familje pavarësisht bindjeve politike. Shqiptarët janë të lirë të kenë bindjet e tyre, por shteti është i detyruar t'u shërbejë të gjithëve", - theksoi Rama. Ai foli sërish për institucione që nuk iu shërbejnë qytetarëve, duke marrë si shembull hipotekat, që janë drejtuar nga zyrtarë të LSI- së. "Sa prej jush janë ndjerë të zhgënjyer kur kanë dalë nga një zyrë shteti? Sa herë jeni detyruar të paguani para nëpër hipoteka? Sa herë ka ndodhur që atë që jua jep ligji, nuk jua ka dhënë Maliqi? Kjo, ose do mbarojë më 25 qershor me një votë të bashkuar për PS- në, ose do të vazhdojë dhe të gjithë ata që i çojnë votat te partitë e tjera do vazhdojnë të paguajnë të parët çmimin e kësaj mungese pjekurie", - deklaroi Rama.