Ndëshkohen doganierët dhe punonjësit e Tatimeve
Vukaj: Masa disiplinore për 44 punonjës
Ministrja
e Financave, Helga Vukaj ka propozuar të merren masa disiplinore për 44 punonjës të Tatimeve e Doganave, që janë gjetur me shkelje. "Ministrja e Financave, Helga Vukaj u ka kërkuar institucioneve të varësisë marrjen e masave të menjëhershme për procedimin disiplinor të 44 punonjësve të administratës për shkak të thyerjes së urdhrit të monitorimit dhe VKM 473, duke cenuar kështu standardin zgjedhor dhe mbajtjen larg të administratës nga keqpërdorimi politik. Dokumentacioni u është përcjellë sot institucioneve përkatëse, e më konkretisht: Drejtorisë së Përgjithshme të Tatimeve, Drejtorisë së Përgjithshme të Doganave, Drejtorisë së Shërbimit të Tatimpaguesve, Shtypshkronjës së Letrave me Vlerë si dhe FAF sh. a", thuhet në njoftimin e Ministrisë së Financave. Kërkesa e Ministrisë së Financave për procedimin disiplinor të këtyre punonjësve, erdhi pas inspektimeve intensive të grupeve të punës, të cilat konstatuan se personat në fjalë nuk kanë qenë prezentë në punë, mungesë e cila, gjatë monitorimit, nuk është përligjur me asnjë akt shkresor apo dokumentacion justifikues. Këto raste u përkasin inspektimeve të kryera që nga momenti i hyrjes në fuqi të VKM- së 473, dt. 01.06.2017, deri më datë 21.06.2017. Konstatimet e mësipërme janë raportuar nominalisht edhe pranë TaskForcës. Ministria e Financave u bën thirrje drejtuesve dhe punonjësve të institucioneve në varësi që të zbatojnë me korrektësi udhëzimet e VKM- së nr. 473, në të kundërt do të përballen me përgjegjësi ligjore.