Luan Rama: Kryeministri i papërgjegjshëm, e pret humbja

Lëvizja Socialiste për Integrim denoncoi dje incidente në Ksamil, Gjirokastër e Delvinë Agron Çela sqaron "tërheqjen": Janë makinacione

Lëvizja Socialiste për Integrim denoncoi dje, disa raste incidentesh që u ndodhën përfaqësuesve të saj nga përfaqësues të PS- së. Kështu dje, LSI- ja denoncoi faktin se në Ksamil, "një makinë me targë AA 602 MI, e tipit ' Lancia', me tre anëtarë të Rilindjes, po shpërndan para ndaj banorëve në shkëmbim të votës. U bëjmë thirrje Policisë së Shtetit dhe Prokurorisë të ndërhyjnë menjëherë dhe të vendosë përgjegjësit para ligjit". Por, më pas reagoi kryeministri Rama, i cili tha se personi quhej Ylli Shehu, nënprefekt i LSI- së. Kaq u desh që nënkryetari i LSI- së, Luan Rama të dilte në konferencë shtypi për ta sqaruar më mirë këtë histori. "Jam këtu për të denoncuar në fakt, një akt krejt qesharak dhe tërësisht të papërgjegjshëm nën peshën e panikut dhe të frikës prej humbjes që e pret Rilindjen dhe kryetarin e Rilindjes, sepse kryeministri i vendit është shfaqur sot para pak çastesh si një zëdhënës gënjeshtar dhe i papërgjegjshëm duke publikuar një lajm të rremë", - tha Luan Rama. "Këtë lloj lajthitjeje mund t'ia toleronim ndonjë punonjësi ordiner dhe të paformuar profesionalisht në nivelet e ulëta të administratës dhe jo kryeministrit, që për fat të keq shfaqet më ordiner se kaq. Është e vërtetë që kjo makinë me këtë targë është në pronësi të një qytetari me emrin Ilir Hysi. Por ai nuk është Ilir Hysi i LSI- së. Ai është një Ilir Hysi tjetër, banor në Sarandë, që ka biznesin e vet dhe pjesë të aktivitetit të vet ka dhënien e makinave me qira", - sqaroi Luan Rama. Ai tregoi më tej edhe foton e dy qytetarëve me të njëjtin emër, duke i thënë kryeministrit të mos shfaqet si "një person i papërgjegjshëm, por të paktën kur artikulon lajme të tilla, shfrytëzo atributet që ke si kryeministër për të marrë të gjithë informacionin e nevojshëm e mos u bjer në qafë njerëzve të pafajshëm". Po dje, zyra e LSI- së në Dropull të Gjirokastrës bëri me dije se Policia e Shtetit tmerroi banorët dhe ndaloi makina të përkrahësve të LSI- së me planin për të vendosur drogë në makinat e tyre. Pas këtij skandali, deputeti i Gjirokastrës, Vangjel Tavo komunikoi menjëherë me Drejtorin e Përgjithshëm të Policisë, Haki Çako dhe i kërkoi të merren të gjitha masat për ruajtjen e rendit dhe mospërfshirjen e oficerëve të policisë në inskenime të tilla të rënda në dëm të procesit zgjedhor. Pas rasteve në Ksamil dhe Delvinë, një tjetër denoncim për blerje votash erdhi nga LSI- ja e Sarandës, e cila akuzoi kandidatët e Rilindjes

Alket Hyseni dhe Ramiz Hysi se po blejnë votat në Konispol e Sarandë, përmes një statusi të shpërndarë në profilin e tyre zyrtar në "Facebook". Nga ana tjetër, një lajm për tërheqjen e kandidatit të LSI- së në Shkodër, kryesuesit të listës Agron

Çela u përhap përmes një profili të rremë në rrjetet sociale. Pas këtij lajmi, vetë kandidati u shpreh: "Nuk jam dorëhequr si kandidat për deputet. Është një shpifje që bëhet ndaj meje. Kjo vjen nga frika që i ka hyrë çdo njeriu, sepse ne

tashmë jemi në luftë për deputetin e katërt. Janë makinacione keqdashëse që më detyruan të thyej heshtjen zgjedhore. Vazhdoj të jem në garë. Jemi forcë e parë e paimagjinueshme", - tha Çela në një konferencë të posaçme shtypi. Ministria e Integrimit Europian u bëri dje, thirrje qytetarëve që të denoncojnë rastet e evidentuara nga ana e tyre të përfshirjes së punonjësve të administratës në varësi të kësaj ministrie, në veprime në kundërshtim me legjislacionin dhe aktet nënligjore në fuqi, gjatë procesit zgjedhor për zgjedhjet në Kuvendin e Shqipërisë për vitin 2017.