LAMTUMIRE PIKTORIT TE ABETARES
Një peng për Agim Fajën dhe studioja me nudo e shënime Shuhet piktori i njohur, nga ilustrimet te "Fatosi", te Bienalja e Aleksandrisë
shtë ndarë nga jeta në moshën 78- vjeçare një ndër piktorët më në zë shqiptarë, Agim Faja. I nderuar me titujt "Piktor i Merituar" e "Pishtar i Demokracisë", ai ka marrë pjesë në shumë ekspozita, brenda e jashtë vendit, si në Bienalen e Egjiptit, Kinë, Itali, Vietnam, Algjeri, Francë, Gjermani, Angli etj. Vepra të tij gjenden sot në koleksionet private të të gjitha kontinenteve.
Dje, teksa përcillej për në banesën e fundit, shumë miq kanë shënuar edhe kujtimet e vlerësimet për të. Ndoca edhe pengjet. Si shkrimtarja Flutura Açka.
"Një javë më parë, siç më ndodh shpesh kur jam jashtë, nga shkujdesja ndaj telefonit, e kisha humbur një telefonatë nga miku im Agim Faja. E pashë shumë më vonë se ora 10: 28 kur ai kishte telefonuar. Ndaj i shkrova një SMS: ' I dashur Agim...' dhe mes të tjerash i kërkoja leje nëse mund ta botoja një foto nga të fundit që bëra me të, bashkë me një shënim të vogël të dashurisë dhe admirimit tim për të, dhe se do të vija ta takoja së shpejti. Nuk mora përgjigje, dhe kam një peng të madh se nuk do ta marr më përgjigjen. E kisha bërë rutinë të shkoja shpesh dhe ta takoja në studion e tij. Më telefononte shpesh, më shumë ai me atë kujdesin e tij të patëdytë, thjesht për t'ia dëgjuar zërin njërit- tjetrit".
Shkrimtarja shënonte se "me Agim Fajën jam takuar shpesh në studion e tij në Shijak dhe gjithnjë e kam vërejtur se edhe pse baritja ime shkonte nëpër një hapësirë më të gjerë se ç'ishte studioja e tij e vogël, ai ishte përherë më i informuar se unë mbi botën e madhe, me të mund të flisje gjithçka, por për politikë më pak se për gjithçka". "Rrethuar nga shënime të pafundme të radhuar tashmë në fashikuj të lidhur bukur si ai dinte, mes pikturave të tij, ca edhe nudo të fshehura dikur në të ritë e tij, mes një dashurie dhe përkushtimi të rrallë si e bijve të tij dhe mes kujtimeve që dinte si t'i mbronte dhe çmonte në përkryerje, Agim Fajën e gjeje në punë, edhe pse të tetëdhjetat e tij e kufizonin", shkruante Açka. Kujton se "në tryezën e tij të mbushur me botën e tij pikturike, një tryezë pune që i ngjante një koleksioni të çuditshëm me përmasën e një minibote, nga kujdesi i Durries, së shoqes, sa ishte gjallë, dhe më vonë të birit, Arditit, në tryezë ia behnin gjithfarë pijesh, ëmbëlsirash e frutash mikpritjeje, që e sfidonin për ca çaste shtrëngesën qe i ka shoqëruar gjithë jetën artistët e vërtetë shqiptarë". "Në jetë më ka ndodhur rrallë të takoj njerëz që të kenë një respekt të tillë për kulturën dhe historinë shqiptare si ai. Agim Faja ishte një piktor i mrekullueshëm, por dhe një njeri aq i dashur. Por ishte edhe një muze i gjallë. Dhe ka lënë pas një muze të vyer", vëren Açka.
Shton se "Agim Faja nuk kishte kompjuter që të të habiste me virtualitetin e ftohtë dhe fantazmagorik të dizajnit të sotëm, vazhdonte ashtu me penë e bojëra shkollën e tij "të vjetër" për të cilën botën do ta zërë gjithmonë malli, dhe edhe pse me shkëlqimin e tyre që zë pluhur ndonjëherë në këndin e relikteve, na ndjell një emocion akut kur e ndeshim dhe na bën të na kalojnë një grimherë sindromën e Stendalit, siç më bënin nudot dhe pikturat e hershme në studion e Agim Fajës, që nuk kishin vetëm peshën e dikurshme të emocioneve të tij, por të secilit prej nesh kur jemi tërësisht vetvetja".
"Unë nuk e di nëse i kam të sakta shënimet e takimeve me Agim Fajën, por di që Agim Faja mbante me kujdes çdo detaj të jetës së tij, pasi për të çdo çast kishte vlerën që i jep vetë njeriu, dhe një punëtori të madh si ai çdo çast kishte një peshë specifike të tillë, të pazakontë mes shqiptarësh. Do të më mungosh, miku im, tani kthesën për Shijak do ta marr më rrallë, por ajo studio e vogël në shtëpinë e vjetër në Shijak, është ndër gjërat që do ta vizitoj përherë me mall", e mbyll ajo shënimin e saj.