Rritja e çmimit të ujit të pijshëm, kundërshtojnë banorët: Mos na penalizoni për ata që nuk paguajnë
Plani 4- vjeçar i Ujësjellësit: Ja tarifat për konsumatorët
SHKODËR - Ndërmarrja e Ujësjellës- Kanalizime qytet në Shkodër ka gati planin e saj 4- vjeçar për të rritur çmimin e ujit të pijshëm. Tarifa fikse për ata që e paguajnë aforfe kërkohet që të dyfishohet nga 100 lekë të reja shkojë në 200 lekë. Ndërsa, propozohet të ketë një rritje me 10 lekë për metër kub ujë në sekondë ( nga 40 lekë në 50 lekë). Kjo rritje propozohet për qytetin e Shkodrës, ku aktualisht faturimi arrin në 77%, nga 58% që është faturimi në zonat rurale. Mësohet se mospasja e mundësive për të faturuar zonat periferike të qytetit apo zonat rurale ka detyruar Ndërmarrjen e Ujësjellësit që të rrisë çmimin e ujit të pijshëm, duke goditur kështu pjesën më të shëndoshë të asaj, taksapaguesit e rregullt. Për këtë u zhvillua një dëgjesë publike me qytetarët dhe Entin Rregullator të Ujit. Qytetarët nuk janë aspak dakord me rritjen e çmimit të ujit, pasi sipas tyre ka shumë probleme që nisin që nga mungesa e shërbimit, mungesa e ujit të pijshëm në orare të ndryshme dhe deri tek cilësia e ujit. Ajo që bëri të ditur rritjen e çmimit të ujit është drejtorja tregtare e Ujësjellësit, Arseda Selhani. "Zona e ujësjellësit për Shkodrën pothuajse është 10- fishuar. Kemi një plan 4vjeçar në bazë të kostove që ka kompania e ujësjellësit me bazë natyrisht 2016- ën. Ky plan i ri tarifor synon mbulimin e shpenzimeve, e kombinuar me investime tek matësit për një pjesë të klientëve, që ende nuk janë të pajisur", tha Selhani.
Drejtori i Ujësjellësit, Mark Molla pohoi se ndërmarrja e tij është transparente, por menjëherë hasi në kundërshtinë e qytetarëve. Këta të fundit deklaruan se nuk janë aspak dakord me rritjen e çmimit të ujit të pijshëm. "Përmes rritjes së çmimit, ju kërkoni që të kamuflohen humbjet. Mos vallë kjo rritje e çmimit të ujit vjen nga fryrja e institucionit tuaj. Nuk është e drejtë as që ta mendoni e jo më të veproni për rritje të çmimit të ujit. Pse duhet unë të paguaj përmes kësaj rritje për ata që nuk paguajnë", tha Agim Gruda, njëri prej banorëve. Ky i fundit u shpreh se po të bëhet analiza e ujit, ai do të dalë jo i pijshëm. Ndërkaq, drejtori Mark Molla pohon: "Nuk kemi ardhur për rritje të çmimit, por për një njehsim të faturës, që të kemi një faturë të unifikuar mes qytetit dhe fshatit". Pavarësisht pretendimeve të qytetarëve dhe bindjes së tyre për të mos e rritur çmimin e ujit, Ndërmarrja e Ujësjellësit do t'i drejtohet Entit Rregullator duke mos pasur një tërheqje në kërkesën e saj për rritjen e çmimit të ujit të pijshëm. Në fund do jetë ky ent që do vendosë nëse në Shkodër duhet rritur apo jo tarifimi për ujin e pijshëm tek qytetarët. se. ni.