Merkel vlerëson Ramën: Shqipëria po bën progres nën udhëheqjen e tij
Samiti i Triestes, Hahn: BE, 200 milionë euro për projektet e 6 vendeve të Ballkanit Kryeministri shqiptar mohon tensionet me Zaev
Shqipëria do të jetë pjesë e grupit të vendeve të rajonit, që do të përfitojnë nga Bashkimi Evropian rreth 1 miliard euro në 10 vitet e ardhshme. Komisioneri për Zgjerimin, Johannes Hahn bëri të ditur këtë njoftim, duke e detajuar shumën, duke folur nga Trieste ku u mbajt dje samiti mes vendeve të Ballkanit Perëndimor dhe Bashkimit Europian. Komisioneri për Zgjerimin, Johanes Hahn foli për një ndërlidhje më të mirë mes vendeve ballkanike si përgatitje për anëtarësimin në Bashkimin Europian. "Ne do të miratojmë një radhë projektesh në fushën e transportit, respektivisht energjisë, në vlerë prej rreth 200 milionë euro, që në fund mund të rezultojnë me investime në vlerë prej rreth 540 milionë eurosh. Këtu është shumë me rëndësi që të krijohet edhe baza për rritjen ekonomike në rajon dhe për një tregti ndër- rajonale, ku ka shumë potencial. Ne mendojmë se në vitet e ardhshme në këtë rajon do të hapen rreth 80.000 vende të reja pune", u shpreh Hahn. Në hapje të samitit, kancelarja Merkel përgëzoi kryeministrin Rama duke thënë se në drejtimin e tij, Shqipëria ka bërë progres. "Përgëzojmë kolegun tonë shqiptar, Edi Rama. Shqipëria nën udhëheqjen e tij ka bërë progres", uroi Merkel, kryeministrin Rama me rastin e fitores në zgjedhjet e 25 qershorit. Kancelarja Angela Merkel dhe Presidenti i Francës, Emanuel Makron kanë përshëndetur nisjen e takimit teksa janë shprehur opti- mistë në krijimin e një tregu të përbashkët Ballkanik, çka do të jepte efekt pozitiv në BE. Edhe Presidenti i Italisë theksoi në deklaratën e tij se duhet një politikë e përbashkët për ekonominë dhe emigracionin, por edhe një Europë më e fortë për të luftuar terrorizmin. I ftuar në këtë forum ishte dhe kryeministri shqiptar, Edi Rama e në krah të tij, ministri i Jashtëm serb, Ivica Daçiç. "Është e nevojshme që liderët e vendeve të Ballkanit Perëndimor të kuptojnë qëllimin e interesin tonë për një bashkëpunim konstruktiv për të punuar ndaj çështjeve të rëndësishme rajonale përmes pro- cesit të Berlinit", u shpreh në këtë Forum Hedvig Morvai, përfaqësues i Fondit Europian për Ballkanin Perëndimor. Ndërkohë, kryeministri Edi Rama foli për situatën në Maqedoni. Kryeministri zbuloi se nuk ka pasur tensione mes shteteve në Trieste, gjatë Samitit të Ballkanit Perëndimor. Rama u shpreh se i ka komunikuar edhe kryeministrit të ri të shtetit fqinj, Zoran Zaev, se shqiptarët duan suksesin e Maqedonisë në të gjitha aspektet. "S'ka pas tensione fare midis nesh si shtete, por ka pasur tensione të brendshme politike dhe një retorikë deri dhe skandaloze brenda Maqedonisë, ku unë nuk dua fare të hyj për të bërë komente. Është shumë e thjeshtë, sa më e fortë Maqedonia, sa më demokratike Maqedonia, sa më e suksesshme Maqedonia, aq më e fortë dhe më e mirë Shqipëria, sepse në Maqedoni jetojnë shqiptarë që janë popullsi shtetformuese dhe sa më mirë të jenë ata, aq më mirë jemi ne, aq më e mirë është e ardhmja për të gjithë", tha Rama.