Rinumërimi në Tiranë, KQZ hap sot 64 kuti votimi

"Berati", administrohen provat e paraqitura nga PD

KQZ

vendosi dje hapjen e disa kutive në qarkun e Tiranës, pas kërkesave nga PS dhe PDIU, të cilat pretendojnë se u janë tjetërsuar disa vota. Vendimi u mor në unanimitet, me 7 votat e anëtarëve që votuan pro. Hapja e kutive dhe rinumërimi i votave do të zhvillohet sot në orën 10: 00 në ambientet e KQZ- së. PDIU pretendon se asaj i janë hequr të paktën 66 vota, ndërkohë për 37 vota marrin mandatin e kryetarit Shpëtim Idrizi. Ndërkohë, PS po ashtu kërkon rinumërim për disa kuti, pasi pretendon se disa vota të saj nuk i janë llogaritur. Sipas kërkesave ankimore, të cilat u pranuan nga institucioni i administrimit të zgjedhjeve, PDIU kërkon hapjen e 41 kutive të votimit, ndërsa PS 23 të tilla. Gjatë nisjes së shqyrtimit, përfaqësuesit e partive kanë kërkuar shtimin e disa kutive në procesin e rinumërimit, ndryshe nga sa kishin kërkuar paraprakisht. Përfaqësuesi i PDIU u shpreh: "Ne kërkojmë që të shtojmë edhe 7 qendra të tjera votimi. Ndërkohë që heqim dorë nga hapja e kutive në katër kuti votimi. Ne vlerësojmë se PDIU- së i mungojnë 66 vota në Tiranë". Ndërsa, përfaqësuesi i PS deklaroi: "Gjatë shqyrtimit të videove dolën fakte dhe prova të reja. Ne kërkojmë që të hapen kutitë edhe të 14 qendrave të tjera të votimit". Po dje KQZ shqyrtoi kërkesën ankimore nr. 3, paraqitur nga subjekti zgjedhor, Partia Demokratike". Në këtë fazë të shqyrtimit, KQZ vendosi administrimin e provave të paraqitura nga subjekti zgjedhor PD dhe të këqyrë dokumentacionin për 4 QV të zonës zgjedhore qarku Berat.