Bashkia, Certifikatë Ndërkombëtare për Ekselencën në Investim e Inovacion

ELBASAN - Bashkia e Elbasanit është e para në vend, por edhe në rajon, e cila është vlerësuar me Certifikatë Ndërkombëtare për Ekselencën në Investim dhe Inovacion. Ky çmim është akorduar nga Asambleja Europiane e Biznesit, me motivacionin: "Për implementim të nivelit të lartë në menaxhim dhe teknologji të Bashkisë Elbasan, dhe njohjen si institucion lider në Zhvillimin e Bashkëpunimit Ndërkombëtar dhe Inovacionit". Maria Sandulyak, drejtoreshë e Programeve dhe koordinatore e eventeve të Asamblesë Europiane të Biznesit, me anë të një letre ka përgëzuar kryetarin e Bashkisë, z. Qazim Sejdini për këtë çmim. "Në emër të organizatorëve do të doja t'ju përgëzoja personalisht me çmimin dallueshëm të merituar të bashkisë suaj- flamurin ndërkombëtar të investimeve dhe tërheqjes inovative ' Flamuri i Europës' dhe Certifikatën Ndërkombëtare të Ekselencës në Investime dhe Inovacion ( ICEII). Prezantimi juaj në forum për aktivitetet rajonale dhe iniciativat e ndërmarra për ekselencë në cilësi padyshim siguroi më shumë ndikim dhe kuptim për iniciativën EBA ( Asambleja Europiane e Biznesit). Ne do të vazhdojmë të promovojmë territorin tuaj në nivel kombëtar dhe ndërkombëtar me anë të profilit të punës të EBA dhe me anë të komunitetit akademik. Materialet dhe informacioni juaj rreth arritjeve dhe prejardhjes historike të Bashkisë Elbasan po punohet për t'u vendosur në faqen zyrtare dhe burimeve mediatike të EBA", thuhet në letrën e Drejtoreshës së Programeve dhe Eventeve në Asamblenë Europiane të Biznesit. Duke vlerësuar këtë çmim, kryebashkiaku Qazim Sejdini pohon se "Bashkia e Elbasanit ka konkurruar duke fituar pikët kryesore në kriteret e vlerësimit, siç janë: Pozita gjeografike, potencialet dhe burimet natyrore, potenciali ekonomik, infrastruktura sociale, transporti dhe energjia. Në këtë kuadër vlen të theksoj faktin se ne jemi një ndër bashkitë e para të cilët jemi të gatshëm që të hyjmë në Europë". fa. po.