Petrit Vasili: Kryeministër i lodhur, bëj një gram punë
Pas publikimit të 100 emrave të zyrtarëve që punojnë në administratat publike si pjesë e raportit që i është vënë në dispozicion Grupit të Punës për reformimin rrënjësor të rrjetit të zyrave të shtetit, reagoi edhe kreu i grupit parlamentar të LSI, Petrit Vasili. Vasili i thotë kryeministrit se është shumë i lodhur, se është damlla i tëri dhe i kërkon të bëjë ndonjë gram punë. Përmes një postimi në "Facebook", Vasili i sugjeron kryeministrit që të merret vetëm me fletërrufe dhe asnjë gram punë. "Shumë i lodhur ky kryeministri ynë, damlla i tëri, vetëm me llogje pazari e me fletërrufe do e kalojë jetën ky, jo e tha jo s'e tha, bëj një gramë punë or kryeministër, se edhe ata që shpikën fletërrufetë në fakt bënin hekurudha dhe elektrifikonin vendin, thanin këneta etj. etj., kurse ky kujë kryeministër ecën nga asgjëja drejt hiçgjësë", shkruan Vasili. Reagimi i kreut të grupit parlamentar të LSIsë erdhi pak minuta pasi Rama postoi një shkrim në "Facebook" të titulluar "Për lulet mos më prek".
Lista me 100 emra zyr tarësh, mjekësh, gjyqtarësh, prokurorësh e arsimtarësh e publikuar nga kryeministri Rama si persona të denoncuar nga komentuesit në faqen e tij në "Facebook" se nuk u kishin dhënë shërbime apo u kishin kërkuar ryshfet, shkaktoi dje reagime të forta deri dhe në denoncime për shkeljen e të drejtave të njeriut. Mentor Petrela, neurokirurgu i njohur botërisht, pjesë e 100 më të mirëve në botë, por prej dy ditësh pjesë e "listës së zezë" të kryeministrit Rama me nëpunësit e denoncuar si abuzues me detyrën, ka thyer heshtjen duke reaguar për lajmin në fjalë. Në një prononcim për "Panorama online", Petrela me ironi pohoi se duke marrë shkas nga dënimet që u bënin komunistët gjyshërve të 1944- ës, e djeshmja ishte lule. Sipas tij, shkaku i sulmit të Ramës është urrejtja e përjetshme dhe zilia ndaj talentit. Duke cituar Volterin, ai shkruan se barbaria po bëhet e padurueshme nga heshtja jonë, nesër ajo do të na therë kur t'i vijë qejfi, madje juridikisht, ndërsa bën edhe një krahasim me sistemin komunist. "Populizmi është një mënyrë cinike për të luajtur me zemërimin e një mase amorfe që e përkëdhelin me emrin popull, që jo rrallë është përdorur për të hequr qafe elitën ' uzurpatore'. Shkaku është urrejtja e përjetshme dhe zilia ndaj talentit. Për të evituar gomarllëkun me të cilin ky populizëm ushqehet me mjetet e sotme të komunikimit, influencuar edhe nga ' Bota është e sheshtë' e Thomas Friedman i kam refuzuar këto mjete. Sot e gjej veten i korruptuar. ' virgo et incorrupta' paradoks i skuadronit ' FB'. Volteri në letrën drejtuar d'Alembert 18 korrik 1766 shkruan '… barbaria po bëhet e padurueshme nga heshtja jonë, nesër ajo do të na therë kur t'i vijë qejfi, madje juridikisht'. Në historinë e familjes pas ardhjes së komunistëve në ' 44 gjyshërit, klasa e përmbysur, e përjetuan me etiketa të varura në qafë ' gjakpirës të popullit' më pas me gjyqe, deportime, burgje, internime, kështu që kjo e sot-
mja me duket lule. Ajo që me shqetësoi është mentaliteti i skuadronit i Saint Just ' Mbreti duhet të gjykohet si armik'. Jetojmë në demokraci, disa ' realiste' janë pjesa më antidemokratike, sidomos kur ndjekin shijen e
plebes, harrojnë se ka padi difamacioni edhe pse Nietszche autokracinë e shtetit e përkufizon ' përbindshi i ftohtë'. Skuadra ' FB' kurrë nuk do të ketë shansin të dëgjojë korin e së vërtetës, që i drejtohet Eteoklit në ' Shtatë kundër Tebes': Ti nuk do të quhesh një i poshtër sepse jetove me arritje'", shprehet z. Petrela. Profesor Mentor Petrela është shefi i Neurokirurgjisë në Qendrën Spitalore Universitare "Nënë Tereza", ndërsa u zgjodh në 2014 ndër 100 neurokirurgët më të mirë të botë. Pjesë e "listës së zezë" së publikuar dy ditë më parë nga kryeministri Edi Rama, listë që përfshinte emrat e 101 zyrtarëve "abuzues" të denoncuar nga qytetarët ishte edhe mjeku nga Vlora, Erjon Koka. Ky i fundit sqaron arsyet pse emri i tij u përfshi në këtë listë. I kontaktuar nga "GSH. al", Koka sqaron se ishte pjesë e kësaj liste vetëm për faktin se nuk i ka dhënë grupin maksimal të invaliditetit një pacienteje. Koka shprehet se edhe atij i lind e drejta të bëjë një kundërdenoncim për shpifje dhe dezintegrim të figurës së mjekut. "Jam listuar si abuzues me detyrën, pasi nuk i kam dhënë grupin maksimal të invaliditetit një pacienteje, E. P., që e kërkonte dhe pretendonte se i takonte. Vetëm kjo si indicie a përbën një bazë për një akuzë të tillë? Po mua më lind e drejta të bëj kundërde-