Skënderbeu kthehet me ' bereqet' nga Kazakistani
Kairati shënon të dy golat e takimit, fillimisht me Gohu dhe më pas vendos autogoli i Akhmetov Në Almati mbyllet 1- 1, favorizohen korçarët
Skënderbeu
kthehet i pamposhtur nga Kazakistani, ndërsa ka sigluar një barazim 1- 1, që e bën shumë më komode ndeshjen e kthimit në Korçë. Në Almatin e largët vendësit e kanë gjetur shumë shpejt rrugën e rrjetës, kur sulmuesi kryesor i tyre, Gohu, tundi rrjetën e Shehit që në minutën e 9- të, duke krijuar përshtypjen për një fitore të lehtë të Kairatit. Por Skënderbeu di të rikthehet në lojë dhe luan denjësisht përballë rivalit të fortë. Latifi e Taku do t'i afrohen në dy momente golit të barazimit, por goli do të vijë vetëm në pjesën e dytë. Vangjeli zbret bukur nga e djathta dhe pason në zonë, aty ku Akhmetov shtyn topin në portë nën presionin e Nimagës, duke bërë që korçarët të festojnë barazimin e merituar. Në minutat e mbetura nuk do të ketë më gola, ndërsa Skënderbeu merr me vete nga Almati një barazim me shumë vlera, i cili bën që në Korçë të ëndërrojnë kualifikimin për në turin e tretë.
Trajneri i Skënderbeut, Ilir Daja, ia dha meritën eksperiencës së fituar nga skuadra gjatë pjesëmarrjes në grupe para dy sezoneve për performancën mjaft të mirë të zhvilluar në Almati përballë Kairatit. Në konferencën për shtyp pas ndeshjes, ai përmendi gjithashtu ndikimin e ndryshim- it të orarit, i cili tashmë sipas tij do të jetë një problem për skuadrën kazake. "Siç e thashë edhe dje, e dinim që përballeshim me një kundërshtar të fortë. Ishim përgatitur mirë për ndeshjen dhe bëmë zgjedhjet e duhura taktike. Kemi luajtur më parë në grupet e Ligës së Europës dhe e dimë që jemi aq të fortë sa të bëjmë atë që duam në fushë. Eksperienca që kemi fituar nga grupet na ndihmoi shumë sot ( dje). Bëmë një lojë sipas planit, me pasa të shkurtra, dhe nuk i lejuam Kairatit hapësirë. Rezultati që morëm është i favorshëm. Dua të përsëris që ndryshimi i orës ndikoi në lojë, por tashmë kjo kthehet në avantazh për ne pasi këto kushte do t'i vuajë Kairati. Gjithashtu do të kemi mbështetjen e tifozëve, dhe kemi në favor një gol të shënuar në fushë kundërshtare", - u shpreh Ilir Daja.