Operacioni, sekuestrohen 15.6 tonë kanabis në Vlorë
Arrestohen 9 persona, 2 prej tyre inspektorë policie e 1 kryeplak. Sekuestrohen edhe 5 kallashnikovë Droga me destinacion Italinë u gjet në 3 banesa në zonën e Llakatundit
Mbi 15.6 tonë kanabis sativa janë sekues truar gjatë një superaksioni të Policisë së Shtetit në bashkëpunim me Forcat e Ndërhyrjes së Shpejtë ( FNSH) dhe SHÇBA, ndërsa janë arrestuar 9 persona, ku dy prej tyre janë efektivë të forcave të Rendit, ndërsa një tjetër është kryeplak. Mësohet se operacioni është zhvilluar në orët e para të mëngjesit të djeshëm në Llakatund të Vlorës në kuadër të një hetimi tërësisht policor. Burime zyrtare nga Policia e Shtetit bënë me dije se sasia e madhe e lëndës narkotike, që dyshohet se kishte destinacion Italinë u gjet në tri banesa, në fshatin Drithas. Në operacionin, i cili drejtohej nga kreu i Policisë së Shtetit, Haki Çako kanë marrë pjesë rreth 150 forca policie, kryesisht efektivët e DVP Vlorë në bashkëpunim me FNSH- n e Fierit.
SUPEROPERACIONI
Pas informacioneve të sakta dhe si rezultat i veprimeve të kryera në mënyrë të mirorganizuar është bërë ndërhyrja në tri banesa në fshatin Drithas, ku dyshohej se mund të kishte lëndë narkotike. Gjatë operacionit, duke qenë se hetimi nxori se në këtë veprimtari kriminale ishin implikuar edhe punonjës policie, veprimet procedurale për punonjësit e policisë janë kryer në bashkëpunim me SHÇBA për arrestimin e tyre. Nga kontrolli i ushtruar në këto banesa, shërbimet e policisë kanë konstatuar sasi të konsiderueshme me lëndë narkotike nëpër dhoma, në formë presimi dhe çokollate, të ndara nëpër pako dhe thasë plastikë të zinj. Gjithashtu, është konstatuar një bazë e gjerë materiale si: 3 presa, sita, përbërës kimikë, vaj hashashi etj., të cilat shërbenin jo vetëm për presimin e lëndës narkotike, por edhe të përpunimit të saj me përbërës kimikë, duke i dhënë formën e çokollatës etj. Sipas bluve, gjatë operacionit të djeshëm janë sekuestruar edhe 5 armë zjarri kallashnikov si dhe 4 automjete: "ML- Benz", "Mitsubishi", "Jeep" dhe furgon. Po të njëjtat burime pohuan se në operacionin e djeshëm është zbuluar një parcelë e kultivuar me bimë narkotike në oborrin e banesës të një punonjësi policie. Konkretisht, në banesën e inspektorit të policisë, Lirim Lamaj ( në oborr) u gjetën dhe u sekuestruan në cilësinë e provës materiale 270 bimë të mbjella kanabis.
ARRESTIMET
Pas hetimeve intensive në lidhje me tonelatat e sekuestruara në zonën e Llakatundit, janë shoqëruar dhjetëra persona, prej të cilëve janë arrestuar në flagrancë 9 prej tyre, si autorë të dyshuar, përgjegjës dhe të implikuar në këtë veprimtari kriminale. Burime nga Policia e Shtetit deklaruan se janë arrestuar këta shtetas:
1. Inspektor Lirim Lamaj, 49 vjeç, me detyrë SPZ në Komisariatin e Policisë Vlorë, për veprat penale "Kultivimi i bimëve narkotike" dhe "Shpërdorim detyre".
2. Inspektor Avdyl Sinanaj, 56 vjeç, me detyrë SPZ në Komisariatin e Policisë Vlorë, për veprën penale "Shpërdorim detyre".
3. Astrit Lamaj ( vëllai i Lirim Lamajt), 37 vjeç, banues në fshatin Drithas, Vlorë, arrestuar për veprën penale "Kultivim i bimëve narkotike".
4. Balil Gjata, 69 vjeç, banues në fshatin Drithas të Njësisë Administrative Shushicë, Vlorë, me detyrë kryeplak i fshatit Drithas. Arrestuar për veprat penale "Shpërdorim detyre" dhe "Moskallëzim krimi".
5. Myzafer Tushaj, 66 vjeç, banues në fshatin Drithas, Vlorë.
6. Ervin Tushaj, 42 vjeç, banues në fshatin Drithas, Vlorë. ( Babë e birë, të cilët kishin fshehur lëndën narkotike në banesën e shtetasit Z. A).
7. Rakip Arapaj, 58 vjeç, banues në fshatin Drithas, Vlorë ( iu gjet sasi e konsiderueshme me lëndë narkotike në banesën e tij).
8. Kudret Tushaj, 71 vjeç, banues në fshatin Drithas, Vlorë.
9. Elion Tafili, 43 vjeç, banues në fshatin Llakatund, Vlorë.