Basha: Nuk ka asnjë shans për koalicion me Edi Ramën
Dy kandidatët e PD- së për kryetar takojnë demokratët e veriut Selami: Basha vlerë për PD- në, por i vjetruar
Dy kandidatët për kry etar të PD- së Lulzim Basha dhe Eduard Selami ishin dje në takime me demokratët e Kukësit, Hasit e Tropojës, dhe të Njësisë 7 në Tiranë. Gjatë fjalës së tij, Basha u shpreh se marrëveshja me Edi Ramën dështoi dhe nuk do të ketë asnjë pakt me partitë që blenë e manipuluan votën e shqiptarëve. Kjo, sipas Bashës është një "betejë, e cila nuk mbaron me kaq, marrëveshja e 18 majit na diktoi provën nën presionin ndërkombëtar, me Edi Rama Kryeministër, prova dështoi. Ajo që ne kishim thënë u provua, nuk ka zgjedhje me Edi Ramën kryeministër, është armik i zgjedhjeve të lira e të ndershme. Kur flas për përballje totale, për zgjedhje të lira e të ndershme, sigurisht që s'ka asnjë shans lloj bashkëpunimi politik apo koalicioni me Edi Ramën. I vetmi shans është përballja dhe fitorja përmes përballjes", deklaroi Lulzim Basha. Beteja për zgjedhje të lira e të ndershme do të vazhdojë deri në fund, tha Basha, duke shtuar se vetëm PD e ka sot moralin për t'i prirë kësaj kauze. "Ju siguroj që do të vazhdoj t'ju shërbej me sakrificë totale, çdo sekondë të drejtimit tim, duke luftuar me ju dhe për ju, për çdo demokrat dhe për çdo shqiptar, me të gjithë demokratët e bashkuar në një betejë, e cila nuk ka dhe nuk mund të ketë asnjë përfundim tjetër, përveç fitores së të drejtës, zgjedhje të lira e të ndershme e përmes tyre, fi- tores së projektit tonë", tha Basha. Nga ana e tij, kandidati tjetër, Eduard Selami akuzoi Bashën se ka dështuar me drejtimin e PD- së. Selami tha se Partia Demokratike ka emergjencë rikthimin e besimit te ndërkombëtarët, duke theksuar se me përjashtim të vitit 1997, lidershipi aktual është më i izoluar se kurrë. "Të rikthejmë besimin me partnerët tanë ndërkombëtarë që sot nuk e kemi. Me përjashtim të vitit 97, lidershipi i PD sot është më i izoluar se kurrë me partnerët tanë ndërkombëtarë. Na dolën kundër në mënyrën më flagrante për shkak të gabimeve tona", tha Selami. Por, në një status pasdite në "FB", ai u shpreh: "Sot janë dy modele qartazi të kundërta. Zoti Basha është vlerë në PD me eksperiencën e tij si kryetar, por demokratët duan dhe meritojnë më shumë se ajo që mund të japë ai, e cila tashmë është e vjetruar dhe e refuzuar". Në takim me demokratët e veriut, Selami tha se Basha përfaqëson një model të dështuar. "Kur u ktheva nga Amerika ne vitin 2013, kam qenë shumë afër vendosjes së kandidaturës për kryetar partie. Por u takova me zotin Basha, dhe
i thashë cila ishte ambicia ime, pikërisht ta ktheja PD, në parti bashkëkohore, të ktheja demokracinë. Pa mbaruar unë, zoti Basha, vazhdonte fjalinë time. Dhe me të vërtetë e kam falënderuar. Thashë sa mirë një i ri i edukuar jashtë, vjen për të kontribuar. Thashë hajde ta bëjmë së bashku dhe tërhoqa kandidaturën, sepse mendoja që kandidatura e Bashës është më e mirë në atë kohë, por gjerat rrodhën ndryshe", tha Selami.