Rama: Ka akoma për të bërë për kapjen e kokave të krimit
Kryeministri në takimin raportues: Muajt në vijim, të rrezikshëm për hashashin "Të vetëdijshëm se prania 27 vjet e kanabisit do lërë gjurmë"
Kryeministri Edi Rama bëri të ditur dje, se muajt në vijim janë muaj rreziku për kanabisin, veçanërisht në disa zona të thella të vendit. Gjatë fjalës që mbajti në takimin raportues në Zyrën Operacionale të Situatës të Task- Forcës për zbatimin e Planit Kombëtar të Luftës për Parandalimin e Kultivimit dhe Trafikimit të Kanabisit, Rama përshëndeti punën e bërë nga policia. "Objektivi i parë themelor, - tha Rama, - duhet të jenë kriminelët dhe pastaj bimët, jo bimët e pastaj shohim e bëjmë për kriminelët". "Duhet të angazhohemi fuqishëm për të adresuar dhe një shqetësim jo të parëndësishëm të opinionit publik, që ka të bëjë me kthimin në përparësi absolute të goditjes së krerëve të këtyre grupeve kriminale dhe të sekuestrimit të aseteve. Policia e shtetit ka bërë progres në këtë drejtim gjatë këtyre 46 muajve që jemi në detyrë, por jemi të vetëdijshëm se në kuadrin e goditjes së kokave dhe sekuestrimit të aseteve kriminale ka shumë akoma për të bërë", - tha Rama. "Është e qartë që, ashtu sikundër e kemi paraparë, Plani Kombëtar, i cili në bazën e vet ka bashkëpunimin ndërinstitucional, qasjen e integruar dhe ritmin e lartë operacional, e ka ngushtuar në maksimum hapësirën, veprimin e krimit në fushën e nxehtë të kultivimit të kanabisit", - tha dje, Rama. "Unë besoj se kjo është një shprehje kuptimplotë jo vetëm e një pune sistematike dhe konsekuente nga ana e qeverisë dhe e Policisë së Shtetit, qysh prej ditës së parë që ne e kemi nisur këtë betejë të gjatë e jo të lehtë, por është edhe një shprehje kuptimplotë e të vërtetës se, pavarësisht trashëgimisë shumë të rënduar negative, për shkak të mungesës së shtetit dhe të ligjit, suksesi spektakolar që policia arriti në Lazarat, tanimë po bëhet sukses në të gjithë hartën e territorit të vendit", - u shpreh më tej kreu i qeverisë. "Nuk është pa domethënie edhe fakti se, nga të gjitha raportimet e derisotme, Gjirokastra është një qark me shifrat zero në kultivimin e kanabisit, ashtu sikundër në nivel zero kanë maksimale, në raport me gjithë ata njerëz që kanë nevojë krejt të natyrshme për alternativa, për të pasur një mundësi jetese të ndershme", - shtoi ai. "Besoj se ndani me mua, jo shqetësimin, por opinionin që ky proces duhet të vazhdojë deri në fund. Muajt që kemi përpara janë potencialisht muaji rreziku, kështu që nuk duhet mbyllur për asnjë moment syri dhe duhet në çdo moment të vazhdojë intesivisht qasja e integruar me institucionet e tjera. Vlen të nënvizohet që, edhe roli i Shërbimit, edhe roli i Prokurorisë në përgjigjen e shpejtë ndaj kërkesave të Policisë së Shtetit, ka qenë dhe mbetet i rëndësishëm deri në fund të këtij procesi", - u tha Rama drejtuesve të policisë dhe hetimit. Ai vlerësoi "Policinë e Shtetit edhe për goditjen, më në fund, të zyrtarëve publikë që kanë dështuar në ushtrimin e përgjegjësive të tyre në këtë fushë, dhe që tanimë janë vënë përpara përgjegjësive ligjore për moskallëzim të këtij krimi".