Plagosja e pronarit të argjendarisë, policia arreston autorin e dyshuar
28- vjeçari: Nuk kam lidhje me ngjarjen, po më mbani kot në komisariat Në pranga Albi Nazaj nga Vlora, i dënuar për vjedhje
Vetëm një ditë pas pla gosjes së pronarit të argjendarisë Kashara, Policia e Tiranës ka vënë në pranga autorin e dyshuar. I arrestuari është një 28- vjeçar nga Vlora i identifikuar si Albi Nazaj, i cili prej disa kohësh banonte në kryeqytet. Dy ditë më parë, Nazaj qëlloi me pistoletë 28vjeçarin Vangjush Kashara, në tentativë për t'i grabitur biznesin. Burime pranë policisë bënë dje me dije, se identifikimi i autorit të dyshuar është bërë nga pamjet e kamerave të sigurisë si dhe nga dëshmitë që efektivët e policisë kanë marrë nga dëshmitarët që ndodheshin në vendin e ngjarjes. Mësohet se 28- vjeçari u kap në rrugën "5 Maji", shumë pranë vendit ku banonte. Gjatë marrjes në pyetje, ai ka mohuar të ketë lidhje me ngjarjen dhe ka pretenduar që mëngjesin e së hënës nuk ndodhej në "Rrugën e Dibrës", aty ku ndodhi edhe plagosja e 28- vjeçarit gjatë një tentative grabitjeje. Sipas të njëjtave burime, grupi hetimor kreu edhe disa kontrolle për të sekuestruar armën që u përdor në krim, por nuk mundi ta gjejë atë. Dyshimet janë se i riu nga Vlora mund ta ketë hedhur pistoletën në ndonjë kosh plehrash pak pasi ka kryer plagosjen e pronarit të argjendarisë.
ARRESTIMI
Burimet sqaruan dje, se kanë qenë dëshmitë e personave që ndodheshin në vendin e ngjarjes ato që ndihmuan oficerët e krimeve për identifikimin e autorit. Ata kanë pohuar para uniformave blu se, pasi kanë dëgjuar dy të shtëna arme, kanë parë një djalë të ri teksa largohej me vrap. Sipas tyre, ai ishte i veshur me xhinse dhe bluzë të bardhë, dhe në njërin krah i dukej një tatuazh. Nisur nga dëshmitë e dhëna, por edhe nga pamjet e kamerave të sigurisë që policia sekuestroi përgjatë rrugës ku ndodhi ngjarja, u bë i mundur identifikimi dhe vënia në pran- ga e autorit të dyshuar të plagosjes së 28- vjeçarit Kashara. I arrestuari Albi Nazaj njihet nga policia si person me precedentë të mëparshëm kriminalë, e konkretisht për vjedhje dhe kundërshtim të forcave të rendit. Ai u kap shumë pranë vendit ku banonte dhe jo shumë larg vendit ku ndodhi plagosja. Ndërkaq, ndonëse nuk e ka pranuar autorësinë e krimit, duke pretenduar se në momentin që ka ndodhur ngjarja nuk ndodhej në "Rrugën e Dibrës", grupi hetimor ka marrë kampionë biologjikë për të kryer testin e ADN- së të 28- vjeçarit Nazaj, për t'i krahasuar më pas me gjurmët e lëna nga autori në vendin e ngjarjes apo në trupin e pronarit të argjendarisë gjatë përleshjes. Ngjarja u shënua rreth orës 09: 00 të mëngjesit të ditës së hënë, në "Rrugën e Dibrës". I plagosur mbeti 28- vjeçari Vangjush Kashara. Në drejtim të tij u qëllua me dy plumba pistolete, ku njëri prej tyre e kapi atë në krah, por fatmirësisht ndodhet jashtë rrezikut për jetën.
DËSHMIA
Albi Nazaj në asnjë moment nuk e ka pranuar përgjegjësinë e krimit. "Nuk kam lidhje me këtë ngjarje. Po më mbani kot në komisariat. Në momentin që ka ndodhur ngjarja, unë nuk kam qenë te ' Rruga e Dibrës'", u ka thënë ai uniformave blu të kryeqytetit teksa është marrë në pyetje disa herë me radhë.