Mbytjet e pushuesve në plazhe, Luan Rama: Bilance lufte, mosveprimi i shtetit kriminal

TIRANË - Nënkryetari i Lëvizjes Socialiste për Integrim, Luan Rama ka reaguar pas ngjarjes së rëndë të regjistruar pasditen e djeshme në plazhin e Ksamilit, ku një turiste ruse humbi jetën. Nga ekspertiza, mjekët kanë konstatuar shenja goditjeje në trupin e 15vjeçares, çka konfirmon edhe pretendimin e familjarëve të saj se u godit nga një mjet lundrues. Përmes një postimi në rrjetin social "Facebook", Luan Rama i cilëson si bilanc lufte, në kohë turizmi", rastet e rënda të regjistruara gjatë ditëve të fundit në plazhet shqiptare. "Edhe një tjetër viktimë në plazhet shqiptare! Pas Durrësit, Shëngjinit, Velipojës, Vlorës etj. Hartës së viktimave të mosveprimit kriminal e të qëllimtë të qeverisë i shtohet edhe Ksamili! Kohë turizmi- bilanc lufte! Askush nuk reagon, askush nuk zbaton ligjin, megjithëse ky vend ka edhe qeveri që ka kryeministër, ka edhe ministri të ashtuquajtur turizmi që ka edhe ministër, ka agjenci të bregdetit me drejtor, ka bashki me kinse kryetarë! Ka madje edhe Prokurori të Republikës! Ka e çfarë nuk ka, por askush nuk është për të kryer detyrën, edhe pse ka akte që detyrojnë e normojnë masat e sigurisë në plazhe, qofshin ato publikë apo privatë! Mosveprim kriminal dhe i qëllimtë, për sa kohë askush nuk reagon pas kaq e kaq shumë rastesh të mbytjes së pushuesve e turistëve në plazhet shqiptare!", shkruan Rama.

pas trupi i pajetë i turistes ruse është dërguar me ambulancën e qendrës shëndetësore të Ksamilit në morgun e spitalit të Sarandës. Burime nga ky spital pohuan se pas këqyrjes paraprake, kufoma e 15- vjeçares do të transportohet për ekspertizë mjeko- ligjore në Tiranë për faktin se ajo është shtetase e huaj. Ndërkaq, bluzat e bardha të këtij spitali deklaruan se, "vajza kishte shenja prerjeje në trup, konkretisht në bërryl dhe në shpatullën e majtë. Dyshohet se ajo mund të jetë goditur nga ndonjë motor uji, ose mund të ketë rënë nga lartësia". Sakaq, nga një informacion shtesë i policisë lokale u konfirmua se në trupin e 15- vjeçares ruse janë konstatuar dëmtime dhe prerje në trup. Grupi hetimor po vijon intensivisht punën për zbardhjen e plotë të rrethanave të ngjarjes. Gjithashtu, mësohet se ka nisur edhe kontrolli i motorëve të ujit.