Danilo prezantohet si "qytetar", më bindi Guardiola
Braziliani u ble për 35 mln euro
Danilo
është zyrtarisht futbollist i Mançester Sitit. Braziliani është prezantuar ditën e sotme si blerja më e re nga trajneri Pep Guardiola dhe shefi ekzekutiv Soriano, dhe pritet që të niset drejt Shteteve të Bashkuara ku do t'u bashkohet me ekipin për të kryer fazën përgatitore. Danilo firmosi kontratë 5- vjecare, me Sitin që shpenzoi 30 milionë euro për kartonin e tij, para që shkuan në arkat e Realit të Madridit, me të cilin do të ndeshen me 27 korrik. Në fjalën e parë si qytetar, Danilo ka treguar edhe arsyen pse vendosi të bashkohej me Sitin, i cili para disa ditësh transferoi edhe mbrojtësin e djathtë të Totenhemit, Kajl Uolker, ndërsa braziliani kishte edhe oferta të tjera si nga Çelsi, por edhe nga Juventusi "Për mua është një ditë e madhe, sepse po firmos për një klub të madh si Manchester City. Shpresoj të përmbush pritshmëritë dhe të fitoj Champions Leaguen me skuadrën time të re. Para është një sfidë të cilën dua ta fitoj. Guardiola ka pasur shumë peshë në këtë vendim timin, sepse e dashuroj stilin e lojës që ai aplikon. U binda edhe më shumë nga biseda që pata me të. Mezi po pres të nis punën me trajnerin tim të ri. Jo vetëm Guardiola, por edhe projekti ambicioz i klubit më shtyu të vija këtu. Mendoj se një lojtar që luan në disa role ka një avantazh të madh në këto nivele dhe është shumë i rëndësishëm për skuadrën. Përgjithësisht kam luajtur si anësor i djathtë, por Guardiola më tha se mund të vendosem edhe në të majtë apo në mesfushë, por për mua më shumë rëndësi ka që të jem pjesë e formacionit", është shprehur Danilo. Danilo luajti për dy sezone te Reali i Madridit, duke u aktivizuar në 55 ndeshje në total. Me madrilenët fitoi një titull të La Liga- s, dy Champions League, Superkupën e Europës dhe Botërorin për Klube.