Meta: Bashkëpunues me Ramën, e pashë dhe më duket se më pa
Intervista pas betimit, presidenti: LSI është si çdo forcë tjetër për mua "Monika, zonjë e parë? Nuk ndihet rehat në rresht"
Presidenti i ri i vendit, Ilir Meta deklaroi dje se do të jetë bashkëpunues me kryeministrin Edi Rama, pavarësisht debateve para zgjedhjeve, por ai lajmëron se në Presidencë nuk është për t'i bërë fresk qeverisë dhe as për ta bllokuar. Në intervistën e parë si president zyrtar, në emisionin "Top Story", të gazetarit Sokol Balla, i pyetur në lidhje me mospranimin e bashkëshortes së tij, kryetares së LSI- së, Monika Kryemadhi të funksionit "zonjë e parë", Meta tha se ajo nuk pranon të vihet në rresht.
Nuk mund të mos vihej re që për herë të parë presidenti nuk rreshton pranë tij bashkëshorten. A është bashkëshortja juaj zonja e parë?
Personi për të cilin flisni nuk ndihet rehat në rresht. Së dyti, Monika ka bërë zgjedhjen e saj publike. Kur unë jam zgjedhur president, ajo është zgjedhur nënkryetare e LSI, për të qenë një politikane aktive. Ndaj, unë besoj se pozicioni i saj dhe paraqitja e sotme janë një mesazh i qartë se presidenti dhe Presidenca nuk mund të përfitohen nga askush, përfshirë për qëllime të caktuara politike.
Gjëja e dytë që më bëri përshtypje ishte shtrëngimi i duarve me kryeministrin. Shtrënguat duart, por jo shikimin...
Unë e pash dhe më duket se edhe ai më pa.
Këtej e tutje doni, s'doni do keni kontakte institucionale, por a do ketë kontakt njerëzor mes Ramës dhe Metës?
Unë e thash qartë. Sapo hyra këtu, lash pas 25 vite në politike. Është detyrim kushtetues dhe qytetar dhe unë jam i hapur për bashkëpunim jo vetëm me zotin Rama, por edhe aktorët e tjerë politikë në vend. Është detyrim.
A menduat të jepnit dorëheqjen gjatë këtyre muajve, siç edhe e shprehët?
Unë e kam bërë të qartë pasi jam zgjedhur, kur opozita vijonte protestën. Jemi shprehur edhe më 17 maj edhe zoti Vasili e ka thënë qartë se LSI kërkon zbatimin e paketës "McAllister" dhe se për këtë gjë është e gatshme të tërhiqet edhe nga posti i presidentit, që ishte pikë në këtë paketë. Natyrisht që më pas nuk më ka shkuar ndërmend të jap dorëheqjen për arsye të tjera, pasi do të ishte e papërgjegjshme dhe mungesë respekti për institucionin e Presidencës dhe partnerët e tjerë.
Tek disa shihej me sy të mirë zgjedhja juaj, tek disa jo. Dukej sikur LSI nuk do të mbijetonte pa Ilir Metën...
Dje ishte dje, sot është sot. Aq më tepër që për mua, nga dita e sotme, pas orës 18: 00, ka një ndryshim institucional dhe cilësor. Unë jam i përqendruar në këtë detyrë me shumë përgjegjshmëri dhe në respekt të Kushtetutës. Por sa për këto historitë me LSI- në duhet të përsëris se kur është krijuar LSI- ja, është përcaktuar në statut që kryetari nuk duhet të rrinte më shumë se 2 mandate. U tejkalua dhe sikur të mos ndodhte zgjedhja president, qëndrimi im në krye të LSI do të kishte përfunduar. Tani jam i përqendruar në një detyrë të re, ndaj dhe LSI është njësoj si partitë e tjera.
Pse u përkeqësuan marrëdhëniet kaq shpejt mes partnerëve të qeverisjes?
Ato kanë qenë raporte që i takojnë së kaluarës, tani unë jam i hapur për raporte të reja, institucionale, bashkëpunimi, pa asnjë lloj paragjykimi.
Kam dëgjuar që kryeministri ju ka telefonuar sërish dhe ju sërish nuk jeni përgjigjur. Si do ta menaxhoni këtë raport të ftohur? Sapo u takuam... Por ju i shtrënguat dorën dhe shikonit atletet e tij...
Atletet janë diçka normale, nuk është hera e parë që ai i zgjedh dhe unë i kam dhënë dorën kryeministrit në këtë ceremoni për presidentin.
Ndër vite raporti i presidentit dhe kryeministrit është dukur si një mallkim, në kuptimin që ka qenë problematik. A do ta ndryshoni ju këtë trend?
Mund të them që bashkëpunimi im si kryeministër me presidentin e atëhershëm Rexhep Meidani ka qenë i shkëlqyer. Së dyti, unë jam bashkëpunues me të gjithë dhe padyshim që do të jem me kryeministrin Rama, çdo qeveri e çdo parti të opozitës. Kjo është detyra kryesore e presidentit, të punojë për unitet, në interes të vendit dhe qytetarëve. Pati pikëpyetje përfshirja juaj në fushatë. A keni reflektuar për këtë? Unë jam president nga ora 18: 00. Zoti president, ju patët deklaruar se nuk do të dekretoni emrat që lidhen me kanabizimin dhe e bëtë këtë gjatë periudhës kur ishit zgjedhur president. Thatë që nuk do të dekretoni një kryeministër që vjedh zgjedhjet. Ka pasur akuza nga PD për blerje votash, nga LIBRA për vjedhje, duhet të presim surpriza në shtator për qeverinë e re?
Do të përmbush të gjitha detyrimet e mia kushtetuese në mënyrën më korrekte dhe sigurisht që duhet të presim konstituimin e parlamentit të ri. Saimir Tahirin do ta dekretoni? Duhet të prisni vendime kushtetuese, institucionale dhe transparente. Kjo është një gjuhë institucionale, sepse ka procedura sesi ndodh ky proces. Edhe unë sa kam hyrë, sepse këtu ka një praktikë, ka këshilltarë ka zyra dhe do të më duhet edhe mua koha ime. Do shohim bllokim ambasadorësh? Nuk jam këtu as për t'i bërë fresk qeverisë, as për t'i bërë opozitë dhe as për ta bllokuar. Jam këtu për të bërë më të mirën, për të bashkëpunuar për t'i dhënë vendit më të mirën.
Më kujtohet vizita juaj e parë si kryeministër në Athinë dhe hapet çështjen çame, do ta bëni tani president?
Çështja çame nuk ka nevojë të hapet, ka nevojë të zgjidhet dhe është e rëndësishme të gjejmë një zgjidhje për qytetarët shqiptarë, që janë larguar me dhunë nga trojet e tyre në Greqi në një kohë të caktuar, por acarimi i marrëdhënieve me Greqinë nuk ndihmon në zgjidhjen e këtyre problemeve, përkundrazi dëmtojnë të dyja vendet.
Zoti Rama tha pas fitores se nuk do të mbante fotografinë tuaj si president në zyrën e tij, ju shqetëson kjo?
Mua kjo më qetëson, sepse qetëson edhe atë.
Besimi tek drejtësia është thuajse zero, ju shqetëson kjo?
Kjo më shqetëson, sepse reforma në drejtësi nuk është as e presidentit, as e qeverisë, reforma është e qytetarëve dhe për qytetarët. Unë jam në këtë zyrë për të mos bërë as lojën e qeverisë, as të opozitës, por për të zbatuar Kushtetutën e vendit dhe për të bërë lojën më të mirë për Shqipërinë në mënyrë të hapur, bashkëpunuese, larg konflikteve të panevojshme. Për mua parësore do të jetë transparenca dhe integriteti edhe për çështjet ku ka rol të drejtpërdrejtë presidenti.
Sot jeni president, është mjaft për ambiciet apo planet e Ilir Metës?
Ambicia ime është të përmbush këtë detyrë që më është besuar dhe për mua është e rëndësishme ku do të jetë Shqipëria pas pesë vitesh, jo ku do të jem unë.
Çfarë do të bëni pas 5 vitesh? Do merrni mbrapsht teserën e LSI?
Nuk e di çfarë do të bëj pas 5 vitesh, por di që gjatë këtyre pesë viteve do të bëj gjithçka për t'u qëndruar angazhimeve të mia.