Konflikti, 1 i vrarë dhe 3 të plagosur në Borsh
Ngjarja, për motive pronësie. Policia dhe FNSH arrestojnë pas disa orësh 2 vlonjatët dhe shokun e tyre Përleshja mes dy grupe të rinjsh, 31- vjeçari vdiq nga goditjet me kaçavidë
Sherri mes dy grupe të rinjsh ka përfunduar me vrasjen e njërit prej tyre dhe plagosjen e tre të tjerëve në fshatin Borsh të Sarandës. Ngjarja e rëndë, e cila ka marrë shkas pas një konflikti pronësie, ka ndodhur në orët e para të mëngjesit të djeshëm, në lagjen "Vilë" të këtij fshati ( rruga e plazhit). Burime zyrtare nga policia e Sarandës bënë me dije se rreth orës 00: 40, dy grupe të rinjsh kanë nisur të debatojnë fillimisht me fjalë me njëritjetrin, e më pas kanë përdorur mjete prerëse. Si pasojë kanë mbetur të plagosur shtetasit: Premtim Bega, 31 vjeç; Redinel Ormenaj, 24 vjeç; Donald Kosta, 24 vjeç dhe Enea Myftari, 23 vjeç, të katërt banues në Borsh. Mësohet se, kalimtarë të rastit kanë gjetur katër të plagosurit në rrugë dhe i kanë transportuar fillimisht drejt Qendrës Shëndetësore të Borshit. Fatkeqësisht, Premtim Bega nuk ka mundur t'u rezistojë plagëve të marra ( është goditur disa herë me kaçavidë në trup) dhe ka ndërruar jetë rrugës. Ndërkohë, tre të rinjtë e tjerë të plagosur, pas marrjes së ndihmës së parë, janë transportuar drejt spitalit të Sarandës. Për shkak të gjendjes së rëndë shëndetësore, Donald Kosta është nisur me urgjencë drejt Tiranës, ndërsa Redinel Ormënaj dhe Enea Myftari po trajtohen në spitalin e Sarandës, pasi kanë plagë më të lehta. Pas sinjalizimit për sherrin mes të rinjve, policia e Sarandës ka shkuar menjëherë në vendngjarje dhe ka nisur hetimet.
ARRESTIMI
Nga dëshmitë e të plagosurve dhe disa dëshmitarëve okularë, është bërë i mundur identifikimi dhe arrestimi i tre autorëve të dyshuar të vrasjes së 31- vjeçarit Premtim Bega ( punonte si kuzhinier në një nga restorantet luksoze të zonës). Bëhet fjalë për shtetasit: Ronaldo Shehu, 19 vjeç nga Vlora, Xhonatan Muço, 20 vjeç nga Vlora dhe Thanas Hodo, 26 vjeç, nga Borshi. Për shkak të rrezikshmërisë së tyre, policia e Sarandës ka thirrur në ndihmë dy grupe të FNSH- së dhe kolegë të Vlorës e Himarës. Rreth 30 efektivë policie kanë marrë pjesë në operacionin për arrestimin e agresorëve, i cili ka zgjatur deri në orët e paradites. Mësohet se pak minuta pas krimit, policia ndaloi vlonjatin Ronaldo Shehu, i cili ishte fshehur në një banesë të zonës. Ndërkohë, në mëngjes, në pyllin e Kudhësit, janë gjetur dhe janë vënë në pranga Xhonatan Muço e Thanas Hodo. Sipas burimeve policore, tre të rinjtë e arrestuar akuzohen për veprat penale: "Vrasje në rrethana të tjera cilësuese", kryer në bashkëpunim, dhe "Vrasje në rrethana të tjera cilësuese", kryer në bashkëpunim. Pas ngjarjes së ndodhur në Bur-
sh, hetuesit e çështjes pohuan se dyshohet që dy grupet e të rinjve ishin në konflikt për motive pronësie. Policia dhe prokuroria e Sarandës janë duke hetuar intensivisht për zbardhjen e plotë të rrethanave të kësaj ngjarjeje.