Zguri: U shpenzuan 6 mln $ për zgjedhjet
Kreu i KQZ- së: Në proces morën pjesë rreth 45 mijë persona, që u paguan nga buxheti i shtetit "Më shumë para duhen nëse do të kemi votim elektronik"
Zgjedhjet e 25 qershorit i kanë kushtuar bux hetit të shtetit 6 milionë dollarë. Kjo është shuma që ka shpenzuar Komisioni Qendror i Zgjedhjeve, nga dita e dekretimit të datës së zgjedhjeve nga ish- presidenti Nishani deri në certifikimin përfundimtar të rezultatit të zgjedhjeve. "Zgjedhjet e 25 qershorit kanë kushtuar rreth 6 milionë dollarë. Kjo është shuma e domosdoshme për të përgatitur dhe administruar një proces zgjedhor. Është një shumë që korrespondon pak a shumë edhe me organizimin e proceseve të mëparshme zgjedhore, ndaj themi që në një farë mënyre buxheti i shtetit është i përgatitur për këtë shumë", - tha Klement Zguri, kryetar i KQZ- së, në një intervistë për "Top Channel". Pjesa më e madhe e buxhetit, sipas shpenzimeve të bëra nga KQZ- ja, ka shkuar për mallra dhe shërbime, pra përgatitja teknike e zgjedhjeve, në shumën 448 milionë lekë. "I gjithi ky fond detajohet për gjithçka, çdo shpenzim, çdo procedurë që bëhet dhe realizohet gjatë një procesi zgjedhor, që në momentin që del dekreti i presidentit. Këtu kam parasysh pagat në të gjitha nivelet e komisioneve, KZAZ, Komisionet e Qendrave të Votimit, të grupeve të numërimit, dhe më duhet të them që është një numër i konsiderueshëm pjesëmarrësish. Janë rreth 40- 45 mijë persona të cilët marrin pjesë në proces. Zënë një vend të konsiderueshëm në të gjithë buxhetin që duhet për të përgatitur zgjedh- jet, materialet që janë të domosdoshme për procesin. Kam parasysh këtu fletët e votimit, kutitë, kodet e sigurisë, bojën matrikulluese, ambientet me qira për qendra e votimit apo qendrat e numërimit, pasi shumica janë ambiente private", - u shpreh Zguri. I pyetur nëse do të shpenzohet më pak nëse aplikohet teknologjia në zgjedhjet vendore të 2019ës, Zguri u shpreh: "Edhe në buxhetin aktual, teknologjia zë një vend të veçantë, pasi ne jemi të familjarizuar që në vendin e numërimit të votave, fletët bëhen të dukshme përmes teknologjisë. Është një shumë e caktuar që KQZja ka vlerësuar se duhet për të kryer këtë operacion". "Por, - shtoi ai, - në qoftë se ligjvënësi do të gjykojë dhe do të arsyetojë që teknologjia të përfshihet në një rrafsh më të gjerë, si votimi dhe numërimi elektronik dhe elementët të tjerë, patjetër që korrespondon me një shumë të caktuar". "Nuk jam ekspert dhe s'di të them shifra, por di të them që do të jetë një shifër e konsiderueshme që do të duhet të dalë nga buxheti i shtetit", - tha kreu i KQZ- së. Komisioni miratoi tabelën përfundimtare të rezultatit të zgjedhjeve të 25 qershorit, ditën e mërkurë. Sipas këtij rezultati, në 25 qershor morën pjesë në zgjedhje 46.77% e qytetarëve. Partia Socialiste siguroi 74 mandate ose 764.750 vota në rang vend. Partia Demokratike mori 43 mandate deputetësh ose 456.413 vota në rang vendi. LSI- ja u rendit e treta, me 19 mandate ose 225.901 vota.