Bashkia e Tiranës, nënkryetarja e LSI- së dorëhiqet, shkarkohen 3 drejtorë
Përjashtohen dy këshilltarët që votuan për rritjen e çmimit të ujit Kryemadhi: Nuk blihemi me asnjë çmim, jemi opozitë e fortë
Një ditë pas debateve për rritjen e çmimit të ujit dhe rrjedhjes së votave të dy prej këshilltarëve të LSI- së në Këshillin Bashkiak të Tiranës, kjo parti i përjashtoi ata. Genta Mezini dhe Agim Kraja tashmë janë pozicionuar në anën e këshilltarëve socialistë. Po dje, dha dorëheqjen edhe nënkryetarja e Bashkisë së Tiranës, Brunilda Paskali, përfaqësuese e LSI- së, në bazë të marrëveshjes së 2013- ës mes PS- LSI, e cila u shtri në 2015ën edhe në nivel vendor. "Ky është një vendim politik i marrë duke reflektuar me përgjegjshmëri pas zhvillimeve më të fundit në Këshillin Bashkiak, ku bashkëpunimi institucional i deritanishëm në shërbim të qytetarëve të Tiranës dhe në përmbushje të të gjitha detyrimeve që bashkia ka ndaj tyre, u zëvendësua me partneritetin individual me dy këshilltarë që kanë vepruar në kundërshtim me qëndrimin politik të Lëvizjes Socialiste për Integrim", - u shpreh dje, Brunilda Paskali. "Misioni në opozitë i Lëvizjes Socialiste për Integrim më obligon aktin e dorëheqjes, si dëshmi serioziteti, përkushtimi dhe detyrimi përkrah qytetarëve që me verdiktin e tyre i kanë besuar LSI- së përmbushjen e këtij misioni të rëndësishëm. Gjatë këtyre 2 viteve jam përpjekur të bëj më të mirën për qytetarët e Tiranës brenda kufijve të mandatit tim, dhe këtë do të vazhdoj ta bëj edhe në detyra të tjera në të ardhmen", - tha ajo. Ndërsa përjashtimin e dy këshilltarëve të LSI- së për Tiranën e njoftoi Koordinatorja e Grupit të Këshilltarëve të LSI- së, Eriona Bixha. Grupi i këshilltarëve të LSI- së vendosi "të përjashtojë nga grupi i këshilltarëve të LSI- së, Genta Mezinin dhe Agim Krajën, për veprim në kundërshtim me statutin, me programin dhe vendimin e forumeve drejtuese të LSI- së". "Qëndrimi dhe votimi i tyre në mbledhjen e Këshillit Bashkiak të Tiranës të datës 26 korrik 2017 ka qenë tërësisht individual dhe i shtyrë prej interesave korruptive, dhe nuk ka të bëjë aspak me qëndrimin parimor për bashkëpunim institucional, transparent dhe në shërbim të qytetarëve të shpallur
dhe ofruar me shumë seriozitet nga grupi i këshilltarëve të LSI- së", - tha Bixha.
Po kështu, grupi u propozon forumeve të partisë të përshkallëzojë masat ndëshkuese ndaj tyre. Ndërkohë po dje, kryetari i Bashkisë së Tiranës, Erion Veliaj shkarkoi nga detyra tre drejtues që i përkisnin LSI- së. Ata janë administratori i Farkës, Gazmend Kukli;
drejtuesi i Ndërmarrjes Nr. 3 të qytetit, Artjon Çaushllari dhe drejtoren e Qendrës Sociale në Shkozë, Kajame Guri.
KRYETARJA
Pas zhvillimeve të së mërkurës, reagoi dje kryetarja e LSI- së, Monika Kryemadhi, e cila duke iu përgjigjur edhe akuzave të kreut të PD- së, Lulzim Basha, tha: "Opozita nuk është çështje numrash, por çështje mora-
li! Çdo përpjekje për ta shndërruar atë në lojë interesash, biznesi apo politike, nuk do mundet kurrë të ketë mbështetjen apo partneritetin tonë". "Pozicionimi ynë në opozitë me votën e blerë me lekët e krimit apo vota të blera në kurriz të interesit të qytetarëve, është dhe do të mbetet i qartë dhe pa kompromis. LSI- ja është opozita e fortë e çdo pushteti, të çdo niveli, qendror apo lokal, i cili përpiqet të vjedhë e të abuzojë!" - u shpreh Kryemadhi. Ajo e cilësoi vendimin e këshilltarëve të LSI- së si dinjitoz. "Me keqardhje lexova reagimin e kryetarit të shkrirë të PD- së dhe më duhet t'i kujtoj së pari paaftësinë e tij për të menaxhuar furnizimin me ujë kur ishte kryetar bashkie dhe i kishte të gjitha mundësitë. Së dyti, dua t'i them zotit Basha se këshilltarët e tij dje qëndruan në sallë për të votuar listat me emrat e tyre, që përfitojnë nga kreditë e buta. Dhe ky është një fakt që nuk mund të fshihet, madje as të manipulojë blerjen që iu bë dy këshilltarëve të LSI- së, prej të cilëve ne u distancuam, sepse qëndrimi i LSI- së nuk mund të blihet me asnjë çmim", - tha Kryemadhi.