Genta Mezini: Vota ime për PS, e nderuar përkrah Veliajt

e përjashtuar dje nga grupi i këshilltarëve të LSI- së, deklaruan se as nuk ishin blerë dhe as nuk kishin bërë pazare. Agim Kraja, i cili votoi pro rritjes së çmimit të ujit të pijshëm, mohon akuzat për pazare politike për përfitime personale. "Kemi diskutuar për të mirat dhe të këqijat e rritjes së çmimit të ujit. Pasi dolëm nga mbledhja dhe u dakordësuam, nuk pati ndryshim vendimi dhe nuk kam pasur telefonatë apo njoftim nga askush që vendimi ndryshoi. Kur dakordësohesh një herë dhe pranohen kushtet, mendoj se nuk mund të ketë një vendim të dytë", - sqaroi ai. Këshilltari i LSI- së i kthen përgjigje edhe Luan Ramës. "Jam shumë i sigurt që këtë mandat të pestë, unë ia kam siguruar falë njohjeve të mia, nga votues që nuk janë të Lëvizjes Socialiste për Integrim, por janë bashkëqytetarë të mi nga Kukësi apo Hasi", - tha Kraja. Më pas, edhe Genta Mezini sqaron se tashmë do t'u bashkohet këshilltarëve të PS- së. Ajo tha se vota pro ishte për rindërtimin e Ujësjellësit, ndërsa sa u përket deklaratave të LSI- së se ka shitur votën, ajo thotë se nuk është e vërtetë. Mezini mori pjesë në mbledhjen e Këshillit Bashkiak të Tiranës për herë të parë, pasi zuri vendin e kryetares së LRI- së Floida Kërpaçi, e cila u zgjodh deputete në zgjedhjet parlamentare të 25 qershorit. "Për sa u përket deklaratave të bëra nga LSI- ja për blerjen e votës sime, apo manipulimin e votës sime përkundrejt pazareve që vetëm një dëshpërim i thellë mund ta sajojë, ju bëj me dijeni që asgjë nuk është e vërtetë. Unë premtoj që votën time në Këshillin Bashkiak të Tiranës do ta përdor vetëm në të mirë të interesave të komunitetit. Jam e nderuar që më jepet mundësia të kontribuoj përkrah kryetarit të bashkisë, z. Erion Veliaj, dhe do bëj të pamundurën që të jap gjithë mundësitë e mia në shërbim të qytetarëve", - tha ajo. Ajo shprehet se nuk e sheh më veten pjesë e LSI- së dhe se vota e saj do të jetë pjesë e grupit politik të PS- së.