Malltezi: Situata e mbetjeve, e turpshme. Mziu: Qeveria nuk financon landfillin
Djegia e plehrave në Kamëz, debate mes demokratëve
Një prej zyrtarëve të PD- së, njëherësh dhëndër i ish- kryeministrit Sali Berisha, Jamarbër Malltezi sulmoi dje, kreun e Bashkisë së Kamzës, Xhelal Mziu për djegien e plehrave. Sipas Malltezit, imazhet në Kamëz janë të papranueshme dhe të rrezikshme për banorët. "Turp dhe trishtim me situatën e mbetjeve urbane në Kamëz. Imazhet janë të rënda dhe të papranueshme për banorët dhe me rrezik për shëndetin e njerëzve. Bashkia duhet të reagojë shpejt! Është e vonuar. Edhe nëse kjo vjen si pasojë e papërgjegjshmërisë apo keqdashjes së firmës së kontraktuar, kjo nuk e lehtëson nga përgjegjësia Bashkinë Kamëz. Ta çojë për ndjekje penale dhe për rrezikim të shëndetit të qytetarëve. Por edhe duhet të ketë plan menaxhimi mbetjesh si edhe plane për situata emergjencash që duhet të fusë në përdorim. Për më tepër, landfilli i Sharrës është veç 8 km larg. Kjo është situatë e
papranueshme", - u shpreh Malltezi. Por, menjëherë ka reaguar kryetari i Bashkisë së Kamzës, Xhelal Mziu. Përmes një njoftimi, Mziu shprehet se problemi është krijuar nga vatrat e zjarrit në vend- depozitimin e mbeturinave të Kamzës, duke vështirësuar transportin dhe zhvendosjen e
tyre. "Bashkia po monitoron dhe po ndjek situatën për të neutralizuar ndotjen si shkak i zjarrit të ndezur në këtë vend- depozitim. Ndërkohë, po punohet për të stabilizuar gjendjen dhe për të gjetur alternativat e duhura për transportimin e mbeturinave të qytetit", thuhet në njoftimin e Bashkisë së Kamzës. "Shumë shpejt do ta zgjidhim këtë problem, që nuk është vetëm në Kamëz, por në të gjithë territorin e Shqipërisë. Organizimi i largimit të mbetjeve të qytetit ka filluar dhe së shpejti situata do të jetë normale, duke u ardhur në ndihmë qytetarëve të Kamzës, por edhe bizneseve që janë pranë vend- depozitimit për të vazhduar një aktivitet normal, gjithmonë me kujdesin e mbrojtjes së mjedisit dhe jetës së qytetarëve të Kamzës", thuhet në njoftimin e Mziut.