Tragjedia në Velipojë, vdes në spital pronari i restorantit, Besnik Zenuni
I biri në gjendje kritike, djegie në masën 75% të trupit
SHKODËR - Besnik Zenuni, i cili mbeti i plagosur rëndë nga zjarri i përmasave të mëdha që ra në restorantin e tij në Velipojë, nuk mundi të mbijetojë. Vetëm 43 orë pas ngjarjes, 55- vjeçari ndërroi jetë në repartin e djegieve në QSUT si pasojë e plagëve të rënda në 95% të trupit. Mjekët shpresuan se nëse do të kalonte 72 orë, ai do t'i mbijetonte kësaj tragjedie, por djegiet e rënda në trup i morën atij jetën në orën 23: 30 të së shtunës. Mësohet se Besnik Zenuni kishte rreth 6 vite që e kishte blerë restorantin, i cili ishte edhe njëri prej më të mëdhenjve në zonën e Velipojës. Si pasojë e zjarrit, të lënduar mbetën edhe 3 persona të tjerë, njëri prej të cilëve është djali i tij. E lënduar mbeti Saida Spahija, 19 vjeçe, një pushuese nga Kosova, si dhe infermierja Vjollca Voci, e cila u asfiksua teksa po përpiqej t'u jepte ndihmën e parë të dëmtuarve. Ndërkaq, orë kritike janë edhe për 33- vjeçarin Hektor Zenuni, i cili pësoi djegie në masën 75% të trupit. 33- vjeçari ndodhet në repartin e Djegie- Plastikës në QSUT nën kujdesin e mjekëve. Pas ngjarjes së rëndë, Inspektorati Shtetëror Teknik Industrial ka bërë kallëzim penal ndaj subjektit. Sipas ISHTI- t, në bodrumin e restorantit ishte vendosur në mënyrë të paligjshme një cisternë gazi 1000- litërshe dhe jashtë çdo kushti teknik. Prokuroria e Shkodrës ka regjistruar një procedim për dy vepra të ndryshme penale, konkretisht për "Shkatërrim prone nga pakujdesia" dhe "Shkelje e rregullave të sigurisë teknike", ndërsa hetuesit janë në pritje të ekzaminimit të zjarrfikësve, për të nisur procedimin penal ndaj shkaktarëve të kësaj ngjarjeje. "Pas verifikimeve nga inspektorët, rezulton se subjekti ka të instaluar rez GLN me volum 1000 litra nëntokësorë ( e mbuluar me rërë), jashtë të gjitha kushteve teknike ( poshtë dyshemesë së lokalit dhe afër shkallëve), duke i bërë të pamundura shërbimet e nevojshme teknike apo zhvendosjen e saj në rast nevoje. Ky subjekt, nuk ka paraqitur kërkesë në ISHTI për regjistrimin e pajisjes, duke vënë në shfrytëzim një pajisje të jashtëligjshme. Pas verifikimit, rezulton se shkak i eksplozionit me pasojë rënien e zjarrit, është rrjedh- ja e gazit në ambientet e brendshme të lokalit. Kjo ka ndodhur për shkak të mosrespektimit të kushteve teknike të instalimit", thuhej pak ditë më parë në njoftimin zyrtar të ISHTI- t. se. ni.