Vasili: Situatë e jashtëzakonshme, Shqipëria digjet, kryeministri krihet

LSI sulmon kreun e qeverisë për situatën e zjarreve

LSI

reagoi dje ashpër ndaj kryeministrit Edi Rama, nisur nga situata e krijuar në vend prej zjarreve që po djegin hektarë me pyje. Kreu i grupit parlamentar të LSI- së, Petrit Vasili, e cilësoi situatën e jashtëzakonshme, ndërsa tha se aleanca e kryeministrit me qytetarët është thjesht një demagogji mizore, hipokrite, frikacake. "Situatë e jashtëzakonshme, Shqipëria në flakë. Zjarre të frikshme që po asgjësojnë pasuri natyrore dhe prona të qytetarëve. Aleanca e kryeministrit me qytetarët, thjesht një demagogji mizore, hipokrite, frikacake. 1. Ku është qeveria? 2. Pse nuk shpallet gjendja e jashtëzakonshme? 3. Ku është shtabi qeveritar i emergjencës? 4. Ku është shteti që, në këto ditë të rënda duhej të ishte i gjithi në këmbë?", janë këto disa nga pyetjet që ngriti dje kreu i grupit parlamentar të LSIsë, në një postim në rrjetin social "Facebook". Më tej ai vijoi: "Apo le të digjet vendi dhe pastaj vjen kryeministri për ngushëllim dhe qan me kujë? Shqipëria digjet, kryeministri krihet. ' Deri kur kështu ma?', thoshte Migjeni i madh". Nga ana e saj, deputetja Kejdi Mehmetaj, njëherësh edhe nënkryetare e LSI- së ironizoi gjithashtu kryeministrin Rama, duke i kërkuar që të vijojë mbledhjet dhe të ' pushojë nga puna zjarret' në të gjithë Shqipërinë. "Sugjerim në vazhdën e mbledhjeve urgjente, me pretekst koalicionin me qytetarët, i them kryeministrit të thërrasë menjëherë zjarret në Kryeministri. Përfundimi i mble- dhjes të jetë: pushim i menjëhershëm nga puna i zjarreve në të gjithë Shqipërinë. Kështu, në daljen publike të radhës, kryeministri do e ketë gati shfajësimin edhe në qoftë se do të jetë djegur i gjithë vendi", shkroi dje, deputetja e LSI- së. Reagimi i Mehmetajt u bë pas mbledhjeve që ka pasur kreu i qeverisë me drejtorët e hipotekave dhe më pas edhe drejtorët e spitaleve, të cilëve u kërkoi dorëheqje urgjente për t'u hapur rrugën konkurseve dhe njerëzve të rinj që do ta bëjnë këtë detyrë.