Kryeregjistruesit, Bardhi s'miraton dorëheqjet, Rama i anulon urdhrin
Kryeministri përplaset me ministrin teknik të PD: Qeverinë e drejtoj unë Ministri i Drejtësisë: Do bëjmë hetim administrativ
Kryeministri Edi Rama dhe ministri teknik i Drejtësisë, Gazmend Bardhi janë përplasur dje për dorëheqjet e drejtorëve të hipotekave. Ministri i Drejtësisë Gazmend Bardhi vendosi të mos miratojë kërkesat për dorëheqjen e drejtuesve të Hipotekave të Tiranës, Vlorës, Kukës, Dibër, Elbasan, Tropojë, Has, Mat, Kuçovë, Bulqizë, Lezhë, Kurbin, etj. Në një deklaratë të dhënë për mediat bëhet e ditur se ministri teknik ka kërkuar që më parë të përfundojë një hetim administrative ndaj tyre dhe më pas të miratohet largimi nga puna. Madje, në rast se do të ketë shkelje, Bardhi kërkon dhe procedim disiplinor. Pas këtij njoftimi, Zyra e Kryeministrit njoftoi se "Shefi i qeverisë e ka anuluar urdhrin e ministrit të Drejtësisë, duke bërë të qartë se dorëheqjet nuk mund të refuzohen dhe hetimi administrativ i ministrit mund të vazhdojë pa asnjë pengesë". "Nëse nga hetimi administrativ do të verifikohen shkelje të ligjit, regjistruesit që i kanë bërë këto shkelje duhet të shkojnë përpara drejtësisë", thuhet në njoftimin e Kryeministrit. "Qeveria shqiptare ka një Kod Sjelljeje, të miratuar me VKM, qysh në mbledhjen e saj të parë dhe asnjë ministër, qoftë politik a teknik, qoftë në ikje a në ndenje, nuk mund ta shkelë këtë Kod, i cili përcakton qartë se qeveria nuk është një grup individësh që veprojnë në kokën e tyre, po një skuadër që drejtohet nga Kryeministri dhe funksionon mbi bazën e parimit të thjeshtë të aprovimit paraprak nga Kryeministri, të veprimeve administrative apo komunikimeve të ministrave me publikun", thekson Rama në këtë njoftim për median. Kryeministri Edi Rama u kërkoi dorëheqjen krerëve të hipotekave gjatë një takimi me ta në kryeministri. Ndërsa ministri në vendimin e tij argumenton se "duke vlerësuar se dorëheqjet vijnë në vijim të konstatimit publik të Kryeministrit të Shqipërisë, se këta funksionarë publikë kanë shkelur në mënyrë flagrante të drejtat e qytetarëve, duke konsumuar një tallje kolektive dhe individuale me njerëzit, ministri i Drejtësisë ka marrë një vendim të ndërmjetëm, për pezullimin e procedurave të miratimit të dorëheqjes së tyre, deri në përfundimin e një hetimi të plotë administrativ mbi veprim- tarinë e këtyre funksionarëve publikë". Për këtë qëllim, ministri Bardhi, ka urdhëruar të ngrihen 3 grupe kontrol-
li, me qëllim inspektimin e veprimtarisë së Regjistruesve në ZVRPP përkatëse. Sipas këtij vendimi afati i ushtrimit të kontrollit është 10 ditë nga hyrja në fuqi e urdhrit. "Ministri i Drejtësisë shpreh vendosmërinë e tij se të gjithë regjistruesit e ZVRPP, që kanë kryer shkelje gjatë ushtrimit të detyrës, si dhe kanë cenuar të drejtat e ligjshme të qytetarëve shqiptar, do të largohen nga detyra me masë disiplinore "Shkarkim nga detyra", me qëllim shmangien e ushtrimit të funksioneve publike në të ardhmen. Që nga data e fillimit të detyrës së tij dhe
deri më sot, ministri Bardhi ka urdhëruar shkarkimin nga detyra të rreth 1/ 4 së të gjithë regjistruesve të ZVRPP dhe garanton se nuk do të hezitojë ta bëjë këtë në asnjë rast kur konstatohet cenimi i interesave të qytetarëve apo abuzimi me detyrën", thuhet në njoftim. "Për ministrin e Drejtësisë z. Gazment Bardhi, zyrtarët publikë që cenojnë interesin e qytetarëve shqiptar, apo që kryejnë shkelje të ligjit dhe të drejtave të qytetarëve, deri në nivelin e talljes kolektive me to, nuk mund të largohen me akt dinjiteti, pra me dorëheqje", thuhet në njoftim. Sipas ministrit "Qeveria shqiptare ka një kod sjelljeje dhe asnjë ministër, qoftë politik a teknik, qoftë në ikje a në ndenje, nuk mund ta shkelë këtë kod, i cili përcakton qartë se qeveria nuk është një grup individësh që veprojnë në kokën e tyre, po një skuadër që drejtohet nga kryeministri", e paralajmëroi dje Rama, ministrin teknik.
teknik, "largimi i tyre nga detyra, duhet të jetë një përpjekje e autoriteteve përgjegjëse për të zhdëmtuar cenimin e dinjitetit të qytetarëve, duke i larguar këta zyrtarë me masë disiplinore "Shkarkim nga detyra", apo duke përcjellë informacionin për shkeljet e tyre në organet kompetente. Kjo do të pamundësonte, që në rrethana të caktuara, apo për qëllime politike të momentit, këta funksionarë të riktheheshin në funksione publike në administratë shtetërore dhe të bëheshin premisë për cenimin e interesit të qytetarëve përsëri në të ardhmen".