"Zogu i Zi" me pamje të re, Veliaj thirrje për kursim të ujit
"Telefononi në 0800 44 88 e do ju sjellim furnizim shtesë"
Zogu i Zi" një nga nyjat kyçe të kryeqytetit do të ndërrojë pamje estetikisht, çka do të thotë që nuk do të ketë ndryshim në sistemin e rrugëve, por thjesht në gjelbërimin e rrethores qendrore. Bashkia e Tiranës ka nisur punën për rikonceptimin e kësaj hapësire, për ta bërë atë të frekuentueshme edhe për qytetarët e shumtë. Ndërsa për vendosjen e instilacionit në qendër të rreth- rrotullimit, bashkia po merr propozime nga skulptorë profesionistë. Po kështu, do të vihet në punë dhe shatërvani jofunksional. Ndërkaq, kreu i Bashkisë së Tiranës, Erion Veliaj, ka inspektuar punimet në Selitë, pa harruar t'u bëjë thirrje qytetarëve të mos e shpërdorojnë ujin. Veliaj deklaroi se situata është nën kontroll në mbi 90% të territorit, ndërsa në zonat e tjera, furnizimi po realizohet me ndihmën e boteve, në mënyrë që qytetarët të mos vuajnë mungesën e ujit. "Teksa presim shirat dhe që moti të na shpërblejë me prurje nëpër rezervuarë e burime, është shumë e rëndësishme të vazhdojmë të kursejmë ujin e pijshëm. Çdo ujë që derdhet kot është duke lënë pa ujë dikë tjetër. Vazhdojmë të kemi nën kontroll mbi 90% të territorit të Tiranës dhe për të gjithë problematikën që kemi vetëm te zona e Unazës së Re, ish- zona e komunës Kashar, po vazhdojmë me tri turne botet. Në momentin e parë që njoftohemi, ne menjëherë bëjmë furnizime shtesë", theksoi kryebashkiaku Veliaj. Sa i përket rritjes së çmimit të ujit në Tiranë, Enti Rregullator do e marrë në shqyrtim vendimin e Këshillit Bashkiak të Tiranës, ndërsa miratoi rritjen e çmimit të ujit në Durrës, çmim i cili do pasqyrohet në faturat e shtatorit.