Akuza e ministrit, ' shpërthejnë' kompanitë: Po i bëni presion biznesit për qëllime korruptive!
Pas
publikimit të letrës nga ministri teknik Gazmend Bardhi për mungesën e byzylykëve të shërbimit të provës, ka reaguar kompania si bashkim operatori, e cila publikon kthim- përgjigjen drejtuar ministrit të Drejtësisë, duke informuar se mbas këtij momenti "ka njoftuar titullarin e autoritetit kontraktor se po vihet në rrezik vazhdimësia e kontratës për shkak të presioneve të ushtruara nga ministri për qëllime të kundërligjshme". Mbas tentativës së ministrit për të takuar përfaqësues të kompanisë edhe pse kontrata vazhdon normalisht, është kërkuar zyrtarisht dorëzimi i një malli të dorëzuar sipas afateve të kontratës kohë më parë. "Çdo kërkesë që ka si qëllim vendosjen nën presion të bashkimit të operatorëve ekonomikë, për një punë/ mall apo shërbim të marrë një herë në dorëzim, tregon hapur vullnetin tuaj për vendosjen e këtij bashkim operatorësh nën presion për qëllime korruptive dhe aspak ligjore", thuhet në letrën e kompanisë private. "Në kundërshtim të hapur me ligjin, ministri, edhe pse jo nën cilësinë e titullarit të autoritetit kontraktor, kërkon dorëzimin dhe vlerësimin e një malli të dorëzuar dhe paguar njëkohësisht. Për sa i përket ad- ministrimit të pajisjeve nga kompania, ky është një proces pune normale për sa kohë që procesi i administrimit, montimit, konfigurimit dhe mirëmbajtjes së sistemit, pajisjeve dhe gjithçka që lidhet me objektin e kontratës së prokurimit realizohet nga bashkimi i operatorëve ekonomikë sipas termave të kontratës dhe dokumentacionit standard të tenderit për një periudhë 4 vjet e 1 muaj, bazuar edhe në nenin 11 të kontratës. Këto reagime mediatike nuk janë aspak serioze për vetë Ministrinë e Drejtësisë si institucion që prezumohet se njeh ligjet dhe aktet nënligjore. Krijimi i problematikave artificiale dhe aq më tepër bërja e tyre publike duke dezinformuar opinionin publik, është tentativë për cenimin e besueshmërisë së kompanive tona, për të cilat ne do të marrim të gjitha masat e nevojshme ligjore. Nuk do të vijojmë me publikimin e çdo shkrese drejtuar autoriteteve kompetente, pasi kjo do të ishte e lodhshme për opinionin publik, por ju sigurojmë se çdo shpifje apo tentativë për të dëmtuar padrejtësisht interesat legjitime të kompanive tona do të marrë përgjigjen e merituar", thuhet më tej në reagim.