Edi Rama, bisedë 20 minuta me sekretarin e shtetit, Tillerson
Zyrtari i lartë i SHBA- ve: Fitore kuptimplotë në zgjedhje “PS të pastrojë administratën nga të korruptuarit”
Kryeministri Edi Rama mori dje, një telefonatë nga sekretari i shtetit, Rex Tillerson. "Sekretari Tillerson e ka uruar kryeministrin për fitoren kuptimplotë në zgjedhje", njoftoi zyra e shtypit e Kryeministrisë. "Ai ka shprehur bindjen se mandati i fortë që ka marrë për të qeverisur e vetme, e obligon Partinë Socialiste të thellojë shpejtësinë e reformave, pastrojë administratën nga të korruptuarit dhe shënojë rezultate domethënëse në luftën kundër krimit", thuhet në njoftim. Duke i shprehur kryeministrit të gjithë mbështetjen e qeverisë amerikane në mandatin e ri qeverisës, sekretari i shtetit i ka përcjellë Edi Ramës përshtypjet shumë pozitive të zëvendëspresidentit Pence nga takimi i javës së shkuar në Malin e Zi dhe ka rikonfirmuar vullnetin amerikan për një vëmendje të përqendruar në zhvillimet në rajon. Kryeministri Rama e ka falënderuar bashkëbiseduesin për telefonatën dhe i ka bërë një pasqyrë të plotë të situatës rajonale nga këndvështrimi i vendit tonë, duke u përqendruar kryesisht te dialogu Kosovë- Serbi dhe nevoja për zhbllokimin e ngërçit të emrit të Maqedonisë. Në pjesën e fundit, biseda është shtrirë te roli i Shqipërisë në NATO, kontributi i saj në luftën kundër ekstremizmit të dhunshëm, ku sekretari Tillerson është shprehur me konsideratat më të larta. Ndërsa kryeministri Rama ka kërkuar intensifikimin e bashkëpunimit me SHBA- të
në sektorin e energjisë dhe posaçërisht të naftës e të gazit, çka është pritur me shumë interes nga bashkëbiseduesi. Biseda telefonike mes të dyve ka zgjatur më shumë se njëzet minuta. Kjo bisedë vjen pas takimit që
kryeministri Edi Rama pati javën që shkoi me zv. presidentin amerikan Michael R. Pence, në Podgoricë, gjatë samitit të Kartës së Adriatikut. Samiti ishte një moment i përshtatshëm për vendet e rajonit për të ritheksuar
edhe një herë me palën amerikane rëndësinë strategjike të hapësirës adriatike, si dhe për të ritheksuar vendosmërinë e vendeve të Kartës për të jetësuar integrimin e plotë euroatlantik të Ballkanit Perëndimor. Në fjalën e tij në çelje të punimeve të Samitit, zëvendëspresidenti Pence u shpreh se "si i dërguar i posaçëm i presidentit Trump, kam ardhur këtu për të përshëndetur progresin e Ballkanit Perëndimor. Duke afruar Adriatikun me Atlantikun, do mund të sigurojmë një të ardhme më të mirë jo vetëm për rajonin, por për gjithë Perëndimin". Takimet bilaterale me zëvendëspresidentin Pence si edhe me liderët e tjerë të rajonit, rikonfirmuan vullnetin për të ecur më tej përpara, të gjithë së bashku, në mbrojtje të interesave strategjike të popujve tanë".