Kthimi i 55 qytetarëve në kufi, shefi i Kufirit: Më parë kanë kërkuar azil
Tomor Duro: Po zbatojmë urdhrin e Haki Çakos
Vetëm
në dy javët e para të muajit gusht, 55 qytetarë shqiptarë nuk janë lejuar të udhëtojnë drejt vendeve të Bashkimit Europian, pasi nuk përmbushnin kriteret e Shengenit. Tomor Duro, shef i sektorit të kufirit blu në Policinë e Shtetit, në një intervistë për "News24" sqaroi arsyet se përse qytetarët janë penguar nga autoritetet kufitare të nisen në destinacionet e tyre. Sipas tij, udhëtarët jo vetëm nuk ishin të pajisur me dokumentacionin e rregullt, por ç'është më e rëndësishmja, ata më herët kanë qenë azilkërkues apo të padëshirueshëm në vendet e Bashkimit Europian. "Personat kanë pasur edhe shënim në vendet e Bashkimit Europian, në sistemin e tyre. Që do të thotë që ka pasur refuzim të azilit ekonomik në këto vende, i papërshtatshëm për sigurinë e këtyre vendeve dhe probleme të tilla të sigurisë që shqetësojnë vendet e BEsë. Gjithashtu, nga këta persona, ka pasur edhe disa persona të kthyer deportiv nga vendet e Bashkimit Evropian për problemet e mësipërme, sidomos që kanë të bëjnë në lidhje me kërkimin e azilit të parregullt", - tha ai. Duro sqaron se masat e ndërmarra nga Policia e Shtetit nuk kufizojnë lëvizjen e lirë, por sipas tij qytetarët duhet të zbatojnë rregullat. Ndaj nuk heziton të bëjë dhe një apel për qytetarëve. "U bëjmë thirrje qytetarëve të jenë të rregullt, të pajisur me dokumentacionin e nevojshëm, me qëllim që të mos sjellim shqetësim për të gjithë shtetasit e tjerë që janë të rregullt dhe kalojnë lirshëm kufirin, si dhe të mos jenë problem për vendet e Bashkimit Evropian. Të gjithë ata që kanë dokumentacione të rregullta do të kalojnë lirshëm, ndërsa ata që kanë probleme do t'u kufizohet lëvizja", - theksoi ai. Duke folur me gjuhën e shifrave, kryekomisar Duro thekson se, krahasuar me një vit më parë, numri i azilkërkuesve në vendet e BEsë ka rënë ndjeshëm, megjithatë ai thekson se Policia e Shtetit është e vendosur ta bllokojë fenomenin. Masat e ndërmarra nga Policia e Shtetit kanë si qëllim frenimin e fenomenit të azilkërkimit, që ka shqetësuar jo pak vendet e Bashkimit Europian. Në këtë kuadër, duket se në çdo pikë kufitare po zbatohet me përpikëri urdhri me 14 kushte i kryepolicit Haki Çako, që parashikon kontrolle më të rrepta të qytetarëve të cilët duan të udhëtojnë në hapësirën Shengen.