Trafikimi i armëve nga Rinasi, si u zbulua 32- vjeçari i arrestuar dhe miku i tij
"Drogën e kisha për përdorim vetjak". Nisin verifikimet nëse ka pasur dërgesa të tjera Çullhaj mohon akuzën: S'kam lidhje me rastin
Dy personat e identi fikuar nga policia që bënë dërgesën e tri pakove me armë në aeroportin e Rinasit e që destinacioni përfundimtar do të ishte Londra, u zbuluan nga shenjat e gishtave. Burime të besuara pranë policisë bënë me dije se kjo është prova më e fortë që hetuesit kanë ndaj të arrestuarit Saimir Çullhaj, dhe bashkëpunëtorit të tij, tashmë i shpallur në kërkim, N. F. Tri pakot me pjesë kallashnikovi u zbuluan në aeroport gjatë skanimit, dhe menjëherë për këtë rast policia dhe prokuroria nisën hetimet për trafikimin ndërkombëtar të armëve. Brenda pakove janë konstatuar tri armë zjarri automatik model 56, të çmontuara. Pakot ishin dërguar nëpërmjet një kompanie postare dhe për këtë, fillimisht hetuesit nisën kërkimet duke verifikuar pamjet e kamerave të sigurisë të kësaj kompanie. Por, njëkohësisht, ekspertimi që iu bë edhe tri kutive në fjalë për të verifikuar nëse ndonjëri prej autorëve mund të kishte gabuar duke lënë shenjash gishtash mbi to, çoi në identifikimin e dy personave që kishin bërë edhe dërgesën. Ekspertët zbuluan se ambalazhet që ishin përdorur për mbulimin e pjesëve të armëve dhe për kutitë, ishin me një material qeseje plastike në të cilën kishin mbetur gjurmët e gishtërinjve të të dyshuarve. Pas ekzaminimeve të tyre, për policinë rezultoi se shenjat e gishtërinjve përputheshin me ato të Saimir Çullhajt, 32 vjeç, si dhe të shtetasit me inicialet N. F. Pas kësaj, policia nisi kontrollet në banesat e tyre, ku mundën të arrestonin vetëm Saimir Çullhajn, banues në Shijak, i dënuar më parë për "Trafikim të narkotikëve". Kurse në kërkim është shpallur shtetasi me inicialet N. F., 47 vjeç, banues në Durrës. Të dy këta persona akuzohen për veprën penale "Trafikim i armëve dhe municionit". Çullhajt iu gjet në trup një sasi prej 220 gr lëndë narkotike e llojit marijuanë "çokollatë". Ndërsa, gjatë kontrollit në banesën e shtetasit N. F., policia gjeti një sasi prej 4.5 kg lëndë narkotike e ambalazhuar në një thes, si dhe 32 bimë kanabis sativa. Ndërkaq, burime pranë hetuesve të çështjes bënë me dije se 32vjeçari ka mohuar të jetë i përfshirë me këtë veprimtari kriminale. Ndërsa, për sa i përket sasisë së drogës që iu gjet me vete, ai ka pohuar se e kishte për përdorim vetjak. Nga ana tjetër, burime thanë se kanë prova të mjaftueshme që i përfshin këta dy persona në këtë veprimtari, ndërsa kanë nisur he- timet, në bashkëpunim edhe me autoritetet e huaja, për të zbuluar edhe personin që do të bënte pritjen e pakove në Mbretërinë e Bashkuar, emri i të cilit dyshohet të jetë i rremë.
HETIMET
Hetimet për këtë rast janë duke vijuar nga Prokuroria për Krimet e Rënda, ndërsa janë duke u kryer verifikime mbi telefonatat e bëra nga dy të dyshuarit. Verifikime janë duke u bërë edhe për tërheqjet e parave që ata mund të kenë kryer kohët e fundit nga bankat apo nga shoqëri të tjera të transferimit të parave. Hetuesit e çështjes dyshojnë se këta persona mund të ketë bërë edhe më herët dërgesa të tjera armësh drejt Anglisë, gjë e cila nuk mund të jetë zbuluar nga oficerët e policisë.