Çregjistrimi i makinave, aplikimin “online”
Procedurat dhe dokumentet për të nxjerrë mjetin nga qarkullimi
Qytetarët
që duan të çregjistrojnë një mjet tashmë mund të kryejnë procedurat edhe online. Ealbania njoftoi se kjo mund të kryhet duke ndjekur disa hapa dhe se fizikisht qytetari duhet të paraqitet te Drejtoria e Shërbimit të Transportit Rrugor për të bërë dorëzimin final të dokumenteve. Së pari, pas logimit në portalin e- albania kërkohet shërbimi "Aplikim për çregjistrim të përhershëm mjeti", që është një shërbim elektronik, i cili u mundëson zotëruesve të automjeteve të aplikojnë online për çregjistrim të përhershëm të mjetit si dhe të kryejnë online pagesën përkatëse për aplikimin. Më pas bëhet plotësimi i kërkesave që shfaqen mbi specifikimet e mjetit dhe personit që e disponon duke e dërguar më pas të plotësuar elektronikisht. Çregjistrimi i mjeteve rrugore kryhet në zbatim të ligjit Nr. 8378, datë 22.07.1998 "Kodi Rrugor i Republikës së Shqipërisë" i ndryshuar, VKM Nr. 153, datë 07.04.2000 "Për Miratimin e Rregullores në zbatim të Kodit Rrugor të Republikës së Shqipërisë", i ndryshuar dhe Udhëzimit Nr. 01, datë 18.01.2012 "Mbi Dokumentacionin e Qarkullimit dhe Regjistrimit të Mjeteve Rrugore me Motor dhe Rimorkiove të Tyre", i ndryshuar. Në ligjin për faljen është parashikuar edhe procedura e heqjes nga qarkullimi të mjeteve që nuk janë në përdorim dhe fshirjes së detyrimeve tatimore për këto mjete. Sipas ligjit hiqen nga qarkullimi të gjitha mjetet e regjistruara në Drejtorinë e Përgjithshme të Shërbimit të Transportit Rrugor, për të cilat nuk është kryer asnjë veprim me taksat për këto mjete pas datës 31 dhjetor 2011 e në vijim. "Veprim", nënkuptohen datën e pagesës së taksës në DPSHTRR, pavarësisht vitit, të cilit i përkasin, apo afatit të vlefshmërisë së tyre. Heqja nga qarkullimi e këtyre mjeteve bëhet pasi fshihen/ shuhen detyrimet tatimore të papaguara për to, si: taksa e regjistrimit të përvitshëm të mjeteve dhe taksën vjetore të qarkullimit rrugor, taksa vjetore e mjeteve të përdorura, taksa e mjeteve luksoze, si dhe gjobat e llogaritura për efekt të mospagimit të taksave.