Basha në PPE: Reformimi i sistemit zgjedhor i jep fund manipulimit
Kopenhagen, kreu i PD denoncon qeverinë "Rama" tek liderët e djathtë evropianë "Ndryshimet në Kod, kyçe për demokracinë"
Kreu i opozitës, Lulzim Basha, po merr pjesë në Asamblenë Politike të Partisë Popullore Europiane ( PPE), që zhvillohet në Kopenhagen me pjesëmarrjen e drejtuesve të partive të djathta europiane. Para Asamblesë, Basha bëri një pasqyrë të zhvillimeve politike në vend dhe ndau me politikanët e djathtë europianë vizionin e tij për të ardhmen e PD- së dhe të opozitës. Në mënyrë të veçantë, ai theksoi rëndësinë që ka për opozitën dhe vetë demokracinë në Shqipëri reformimi i sistemit zgjedhor, për t'i dhënë fund përgjithmonë historisë së manipulimit të zgjedhjeve. Në bisedat me drejtuesit e partive simotra, Basha diskutoi gjithashtu mbi përballjen me sfidat për integrimin europian të vendit dhe mori mbështetjen e tyre në këtë proces. Basha mori gjithashtu premtimin për vazhdimin e mbështetjes direkte politike të PPE- së dhe partive simotra për Partisë Demokratike, përfshi mbështetjen me këshillim dhe asistencë në lidhje me strategjinë dhe alternativën opozitare. Prej së dielës, kryetari i PD, Basha nuk ndodhet në Shqipëri, pasi është nisur drejt Kopenhagenit për të marrë pjesë në Asamblenë Politike të PPE, ku pjesëmarrës janë drejtues të partive të djathta europiane. Në takimin e kësaj të marte Basha bëri një pasqyrë të zhvillimeve politike në vend dhe ndau me politikanët e djathtë europianë vizionin e tij për të ardhmen e PD- së dhe të opozitës. Ai theksoi rëndësinë që ka për opozitën dhe vetë demokracinë në Shqipëri reformimi i sistemit zgjedhor, për t'i dhënë fund përgjithmonë historisë së manipulimit të zgjedhjeve. Por pas kthimit nga Kopenhageni, Bashës do t'i duhet të jetë aktiv në takimet me grupin parlamentar dhe jo vetëm, jo për faktin e zgjedhjes së emrave, pasi ai i ka projektuar ndonëse nuk bëhen publikë, por edhe për të diskutuar për protestën e paralajmëruar ditën e shtunë në orën 09: 30 përpara Parlamentit, me
qëllim bllokimin e Gramoz Ruçit kryetar Parlamenti dhe Fatmir Xhafës, ministër i Brendshëm. Strukturat, kryesisht FRPD prej ditësh po diskutojnë skenarët e protestës, ndërsa ende nuk është marrë një vendim përfundimtar për mënyrën si do të zhvillohet. Ndërkohë, ende nuk dihet nëse PD do të
shfrytëzojë edhe rregulloren e Parlamentit për të bllokuar seancën, pasi Sali Berisha është deputeti, të cilit mosha i rezervon mundësinë që të drejtojë seancën e parë. Nuk ka një qëndrim nëse Berisha do të drejtojë seancën apo do ta refuzojë duke ia deleguar këtë rol Gramoz Ruçit, i cili është deputeti i dytë më i
vjetër në Kuvend. Katër vjet më parë, ish- kryetari i PD nuk ka pranuar ta drejtojë seancën e parë duke ia deleguar Namil Dokles. Edhe pse të shtunën me seancën për konstituimin e Parlamentit dhe nisjes së miratimit të qeverisë së re nis zyrtarisht sesioni i ri politik, në PD ende nuk janë
zyrtarizuar emrat që do të drejtojnë organet e kësaj force politike në Parlament. Basha duhet të përzgjedhë emrat që do e përfaqësojnë në organet e Kuvendit. Emër potencial për në krye të Komisionit të Çështjet Sociale dhe Shëndetësisë pritet të jetë deputeti Tritan Shehu.
Luçiano Boçi mund të drejtojë Komisionin e Medias, ndërsa emri i Jorida Tabakut shihet si i mundshëm për drejtimin e Komisionit të Integrimit. Në seancën plenare të së shtunës, Kuvendi do të miratojë 8 komisione të përhershme, 5 do t'i kryesojë PS, ndërsa 3 do t'i drejtojë opozita.