"Bluzat e bardha", të parat që dhurojnë gjak
Në vendin tonë, nevojat për gjak janë 30.000 njësi, ndërkohë mundësohen vetëm rreth 20.000 njësi QSUT, aktivitet për sensibilizimin e opinionit publik
Ditën e djeshme, stafi mjekësor dhe admin istrativ i Qendrës Spitalore Universitare "Nënë Tereza" ka dhuruar gjak në ndihmë të personave në nevojë. Është zgjedhur pikërisht dita e Shenjtërimit të Nënë Terezës për të organizuar këtë aktivitet e për të sensibilizuar opinionin e gjerë mbi rëndësinë e donacionit vullnetar të gjakut. Drejtoria e QSUT në bashkëpunim me Bankën Kombëtare të Gjakut ka ndërmarrë këtë nismë humane për t'iu gjendur sa më pranë të gjithë atyre pacientëve për të cilët transfuzioni i gjakut përbën një domosdoshmëri jetike. Kësaj nisme iu bashkuan profesorë të Universitetit të Mjekësisë, shefat e shërbimeve, mjekë specializantë, staf infermieror dhe sanitar, punonjës të
administratës, studentë të mjekësisë si edhe disa familjarë të pacientëve të shtruar në QSUT. Nëpërmjet këtij aktiviteti, ata duan t'i bëjnë apel shoqërisë që dhurimi i gjakut është një akt human që shpëton jetën e njerëzve në çdo rast emergjence. Asnjë lloj mjekimi nuk mund të zëvendësojë transfuzionin e gjakut, pasi nuk mund të prodhohet artificialisht. "Nevojat për gjak janë shumë të mëdha pasi transfuzioni i gjakut apo përbërësve të tij, shërben shpesh për t'i shpëtuar jetën dikujt që pëson aksident apo ndërhyrje kirurgjikale të shoqëruar me hemorragji, por edhe si kurë shoqëruese në disa patologji, përmendim anemitë, si: talasemia, hemofilia, anemitë hemolitike, leucemitë, të transplantuarit, etj.",- theksoi zv/ drejtoresha e QSUT, Mirela Hasanaj. Gjatë këtij aktiviteti, mjekët kirurgë të shërbimeve të QSUT theksuan se e vetmja mënyrë për të siguruar gjakun është dhurimi e kjo i jep këtij akti human një rëndësi tejet jetike. "Gjaku nuk prodhohet nga industria farmaceutike dhe në shumë raste shpëton jetën e pacientëve tanë gjatë ndërhyrjeve kirurgjikale, ndaj i vetmi burim i sigurimit të tij është nëpërmjet donacionit vullnetar", u shpreh Prof. Asc. Edmond Nuellari, shef i shërbimit të Kirurgjisë Vazale. Ndërsa shefja e shërbimit të Hematologjisë në QSUT, Tatjana Caja dhurimin e gjakut e përshkruan si një akt heroik e solidar. "Duke dhuruar gjak, ju keni kryer një akt heroik, pra i keni shpëtuar jetën dikujt apo keni ndihmuar dikë tjetër që të jetojë më gjatë dhe më mirë. Të dhurosh gjak është një akt solidariteti human që shpëton jetën e njerëzve në nevojë. Ajo është dhurata më e çmuar që ne mund t'i bëjmë një njeriu tjetër që ka nevojë. Ajo është dhurata e jetës",- tha ajo. Sipas statistikave në vendin tonë nevojat për gjak janë rreth 30.000 njësi gjak, ndërkohë që mblidhen rreth 20.000 njësi. Numërohen rreth 300 pacientë me talasemi që marrin gjak çdo muaj, pa llogaritur të aksidentuarit, që kanë nevojë urgjente për gjak apo pacientët, që kanë nevojë për ndërhyrje kirurgjikale. Çdo ditë në Tiranë nevojiten rreth 20 njësi gjak për pacientët me talasemi, 20 njësi gjak për sëmundje malinje të gjakut. Nevojat për gjak janë shumë të mëdha pasi transfuzioni i gjakut apo përbërësve të tij, shërben për të shpëtuar jetë e në rast transfuzioni mund të merret vetëm nga njeriu.