Bashkia e Tiranës bashkëpunon me atë të Vjenës për transportin publik
Bashkëpunimi
mes Bashkisë së Tiranës dhe asaj të Vjenës po forcohet në fusha të ndryshme që lidhen me transportin publik dhe infastrukturën. Kryebashkiaku, Erion Veliaj priti në një vizitë zyrtare delegacionin e kryesuar nga drejtoresha e Përgjithshme e Planifikimit Urban, Zhvillimit dhe Ndërtimit të qytetit të Vjenës, Brigitte Jilka. Gjatë këtij takimi u diskutua mbi çështje si zhvillimi urban, çështjet e transportit dhe të përmirësimit të shërbimeve. Ky bashkëpunim sipas Veliaj, vlerësohet si tejet i rëndësishëm për shkëmbimin e eksperiencave më të mira në fusha të ndryshme, e veçanërisht të ideve inovatore për menaxhimin e qyteteve. "Besoj se, duke bashkëpunuar me menaxherët e qytetit të Vjenës në të gjitha fushat, duke filluar nga transporti publik, infrastruktura, kultura, urbanistika, mund të mësojmë nga më të mirët dhe të shijojmë idetë më inovatore për menaxhimin e Tiranës", theksoi Veliaj. Drejtoresha e Përgjithshme e Planifikimit Urban, Zhvillimit dhe Ndërtimit e Bashkisë së Vjenës, Brigitte Jilka, u shpreh se qeverisja e mirë është çelësi për një jetë më të mirë për qytetarët. "Qeverisja e mirë përfshin mendjen e hapur, përfshin shkëmbimin e ideve dhe eksperiencave e, gjithashtu, përfshirjen e shoqërisë civile. Unë mendoj se kjo është ajo çka nisëm në Vjenë dhe, gjithashtu, këtu në Tiranë", tha Brigitte Jilka. Ndërkaq, delegacioni i Bashkisë së Vjenës dhe përfaqësuesit e Bashkisë së Tiranës zhvilluan edhe një konferencë të përbashkët ku shkëmbyen ide për zhvillimin dhe modernizimin e mëtejshëm të dy qyteteve. Ekspertët ndërkombëtarë u njohën me projektet e banesave sociale në Shkozë, projektet e zhvillimit në zonën Fresk, Kashar, Bathore etj.