PS, disiplinë për ministrat, jo vizita jashtë vendit të enjteve

Rama "rikthen" Tahirin koordinator kombëtar

Ministrat

e deputetët nuk do të planifikojnë asnjë vizitë jashtë vendit ditën e enjte kur ka seancë. Kjo u lajmërua dje në mbledhjen e grupit parlamentar të PS- së nga kryetari i grupit, Taulant Balla dhe u theksua edhe nga kryeministri Edi Rama. Po dje, në mbledhjen e mëngjesit, kryeministri Edi Rama foli për një marrëveshje mirëkuptimi, e cila do të hartohet prej tij dhe do t'u dorëzohet edhe deputetëve për t'u firmosur dhe që "sanksionon rregullat e bashkëpunimit dhe ndërveprimit mes qeverisë, grupit parlamentar dhe PSsë, si tri pjesë të pandashme të të njëjtit ekip qeverisës", tha Rama. Kështu, qeveria do të mblidhet nga një herë në çdo qark gjatë një sesioni parlamentar dhe çdo ministër do të lëvizë një herë në muaj në një qark të vendit. Ndërkohë, ajo që bëri përshtypje ishte besimi që Rama i dha ish- ministrit Saimir Tahiri, duke i caktuar detyrën e koordinatorit kombëtar për bashkëqeverisjen me qytetarët. Në muajin tetor, PS pritet të mbajë edhe asamblenë e radhës për të zgjedhur kryesinë e sekretariatin e ri. Në fund të mbledhjes Rama u kërkoi deputetëve socialistë dhe ministrave që të dhuronin gjak për fëmijët në nevojë: "Balancon atë idenë se ne vetëm ' pimë gjak' dhe krijon një ide që ne edhe mund të japim gjak". Një tjetër risi është që përpos deputetëve, edhe njerëzit e thjeshtë mund të thërrasin në interpelancë kryeministrin dhe ministrat. "Njerëzit e zakonshëm kanë të drejtë të thërrasin në interpelancë ministrin apo kryeministrin. Kryetarët e zgjedhur sot janë edhe zv/ tuaj pranë qeverisë për çdo aspekt dhe problem, përveç mekanizmave që do të përcaktojë marrëveshja", deklaroi ai. Ndërkohë që në fillim të mbledhjes, Rama falënderoi Gramoz Ruçin që sipas tij, i ktheu dinjitetin Kuvendit.