Kammenos: Rama, deklarata provokuese ndaj Greqisë
Reagimi i ministrit grek të Mbrojtjes
Ministri
grek i Mbrojtjes, Panos Kammenos deklaron se Edi Rama po provokon Greqinë me deklarata që shkojnë kundër fqinjësisë së mirë, por edhe interesit të shqiptarëve. Kammenos u shpreh: "Është e vërtetë se në nivel deklaratash verbale zoti Rama është provokues. Dhe paralelisht, edhe disa lëvizje që bëhen rreth minoritetit. Konsideroj se Rama ka përballë shumicën e popullit shqiptar, edhe njerëz që kanë qenë emigrantë në Greqi, njerëz që kanë lidhje me Greqinë, që kërkojnë nënshtetësinë greke. Do ta marrë përgjigjen nga populli shqiptar për këtë sjellje ekstremiste ndaj vendit tonë", tha ai. Kammenos vuri në dukje se deklaratat që bën Rama në Shqipëri nuk janë të njëjta me ato që thotë kur takohen në tryeza ndërkombëtare. "Konsideroj se përpjekjet nga elementë ekstremistë për të krijuar probleme me minoritetin grek të Epirit të Veriut, të vetmin rezultat që do të mund të kenë është izolimi i Shqipërisë. Kur takohemi jashtë shtetit, në nivel deklaratash, shqiptarët janë shumë të kujdesshëm. Shqipëria, megjithëse nuk ka flotë detare, dërgoi një anije në përbërje të SNMG2 në detin Egje, si pjesë e operacionit të përbashkët të NATO- s. Dhe asnjëherë deklaratat që bëhen në nivel të NATO- s nuk janë si deklaratat publike të z. Rama", tha Kammenos.
PAKTI
Pala greke ka kërkuar nga ajo italiane që të bëhet pjesë e zgjidhjes së përcaktimit të shelfit detar midis Greqisë, Italisë dhe Shqipërisë, duke theksuar problemet që kanë lindur me Tiranën pas anulimit të marrëveshjes së detit të vitin 2009 nga Gjykata Kushtetuese e Shqipërisë.