Meta: Të gjejmë forcë për të punuar për të mirën e vendit
Presidenti e qeveria përkujtojnë me dy ceremoni 75- vjetorin e Konferencës së Pezës Veliaj me Peleshin në Varrezat e Dëshmorëve, Ruçi mungon në Pezë
Presidenti, qeveria e Bashkia e Tiranës përkujtuan dje së bashku me veteranët 75- vjetorin e Konferencës historike të Pezës. Në ceremoninë ku mori pjesë Presidenti Ilir Meta, Kuvendi u përfaqësua nga nënkryetarja Vasilika Hysi. Mungoi kryetari Gramoz Ruçi, ndërkohë që nga bashkia ishte nënkryetari Arbjan Mazniku; prefekti i Tiranës, Admir Abrija si dhe deputetë, përfaqësues të pushtetit vendor dhe veteranë të Luftës Antifashiste Nacionalçlirimtare. Ndërkohë në Varrezat e Dëshmorëve po ashtu është kujtuar kjo ngjarje në një ceremoni homazh, ku morën pjesë kreu i Bashkisë së Tiranës, Erion Veliaj dhe ministri i Bujqësisë, Niko Peleshi. Ata kryen homazhet e rastit dhe e konsideruan Konferencën e Pezës si shembull të bashkimit në kohë paqeje të një vendi që aspiron integrimin në BE. Në fjalën e tij në Pezë, Presidenti Ilir Meta shprehu mirënjohjen "për të gjithë ata përfaqësues që lanë dallimet politike dhe idetë e ndryshme dhe u bashkuan këtu në Pezë për një qëllim të përbashkët dhe madhor për çlirimin e vendit nga pushtuesi". "Jemi këtu për të shprehur mirënjohjen edhe ndaj popullit të Pezës dhe ndaj patriotit të jashtëzakonshëm Myslym Pezës, i cili falë patriotizmit të tij, burrërisë së tij, besës së tij, ndihmoi që të bashkoheshin këtu forcat më patriotike të kohës, nacionalistët, antifashistët, komunistët me një platformë të vetme dhe një platformë të përbashkët", tha presidenti. "Nëse do të përsërisja edhe një herë ato vargjet ' ndoshta bimë kjo tokë s'do të lindë, por do të rrisë partizanë', këto janë vargje të cilat janë shkruar në radhë të parë për krahinën e Pezës, e cila është vërtetë një krahinë martire, e cila është një krahinë me kontribute të jashtëzakonshme dhe të pakrahasueshme në Luftën Antifashiste Nacionalçlirimtare", theksoi Meta. "Pikërisht 75 vjet pas Konferencës së Pezës kemi dhe një koinçidencë kuptimplotë, mblidhen shefat e Shtabeve e të gjithë vendeve anëtare të NATO- s në Tiranë, sepse Konferenca e Pezës e vendosi Shqipërinë në rrugën e duhur dhe në aleancën e duhur, në aleancën e lirisë të asaj kohe. Dhe në atë traditë të mrekullueshme edhe sot Shqipëria është në aleancën më të madhe të lirisë, në Evropë dhe në botë, që është ajo e NATO- s", kujtoi presidenti. "Pezën jo vetëm ta kujtojmë dhe gjithashtu këtë konferencë të lavdishme, por mesazhet e saj duhet gjithmonë t'ia përshtatim të tashmes dhe të ardhmes duke gjetur gjithmonë forca dhe vetëdije për t'u bashkuar dhe për të bashkëpunuar për të mirën e Shqipërisë dhe të gjithë shqiptarëve", tha Meta. Presidenti i Republikës nderoi kujtimin e patriotit Myslym Peza, duke vënë një kurorë me lule në vendprehjen e tij e më pas zhvilloi homazhe në varrezat e "Dëshmorëve Pezë", ku vendosi dhe një kurorë me lule duke u përulur me respekt e nderuar sakrificat e vetëmohimin e tyre.