Kulla e Prek Calit, PD: Hakmarrje. Rama: Kokëboshë
Prishet kulla e antikomunistit. Tom Doshi: E kam kushëri, ia prishi bashkia e Paulin Sterkaj Reagon kryetari i bashkisë: Ndërhymë në punimet e reja pa leje
Shembja e Kullës muze të antikomunistit Prek Cali në Vermosh nga Inspektorati Ndërtimor përplasi dje kryeministrin Edi Rama me kreun e PD- së, Lulzim Basha. Basha e konsideron vendimin si akt urrejtjeje ndaj ish- komunistit Prek Cali, ndërsa Rama e quan këtë një sajim. Kryetari i Partisë Demokratike, Lulzim Basha e ka dënuar goditjen e simbolit të kryengritjes së Kelmendin, ndërhyrjen e fadromave për shembjen e kullës së Prek Calit. Sipas Bashës, kulla është ndërtuar me donacione të shqiptarëve që jetojnë në Amerikë dhe qeveria në vend të realizonte restaurime, i çon fadromat kullës së prijësit antikomunist. "Por Edi Rama nuk mund ta durojë nderimin e një prijësi legjendar antikomunist si Prek Cali. Se kur kthen pinjollët e Byrosë dhe xhelatët e diktaturës në krye të vendit, të tremb kujtimi dhe hija e Prek Calit. Ky i sotmi është një akt urrejtjeje, por edhe dobësie. Kelmendasit, malësorët dhe mbarë shqiptarët patriotë do t'ia japin përgjigjen pjellës së keqe", shkroi dje Basha në "FB". Ndërsa kryeministri Edi Rama ka reaguar dy herë në rrjetin social. "Unë, prishësi i kullës së Prekë Calit? Bosh se bosh u mbeti koka o të shkretë, që veç shani për ç'ka sajoni vetë, s'ka derman për ju vajmedet", u shpreh me ironi kryeministri Rama, ndërsa më vonë ai postoi një nga rubrikat e tij ' Amarcord', që ka publikuar në 12 prill të
këtij viti dhe ku ka kujtuar Prek Calin si një burrë të plotfuqishëm dhe bajraktar të malësisë së Kelmendit. Këtë koment Rama e shoqëruar edhe me fjalët: "Kur Prekë Cali kujtohej në këtë faqe të vajmedetshmit ku ishin?", duke ironizuar reagimin e PD- së.
REAGIMET
Ndërkohë dje, në shtëpi-
në e shembur ka shkuar deputeti Tom Doshi, i cili deklaron se është kushëri i Prekë Calit. Deputeti Doshi akuzon deputetin e PS, Paulin Sterkaj dhe kryetarin e bashkisë, Tonin Marinaj për prishjen e shtëpisë së Prekë Calit. "Kam ardhur në Vermosh për dy arsye, sepse është mburrur e gjithë Malësia me emrin e Prekë Calit, edhe unë si fis, si kushëri i tij. Ata që mendojnë se nuk ka lënë kënd mbrapa e kanë gabim, një ndër ta jam edhe unë dhe do ta mbroj shtëpinë e Prekë Calit. Më vjen keq për burrat që pashë me lot në sy, por kjo ishte një pabesi e madhe e dy personave që i keni votuar të dy, kryetari i bashkisë, Tonin Marinaj dhe deputeti i zonës, Paulin Sterkaj", tha Doshi. Ai premtoi se do ta ngrejë vetë 3 kate këtë shtëpi dhe jo 2, madje aty do të bëjë edhe bustin e Prekë Calit. Ndryshe nga pretendimet e deputetit Doshi, përmes një deklarate për shtyp kryebashkiaku i Malësisë së Madhe, Tonin Marinaj hedh poshtë pretendimet dhe deklaron se bashkia ka ndërhyrë vetëm tek punimet e reja, që kanë nisur të bëhen pa leje ndërtimi. "Bashkia Malësi e Madhe ka qenë në pozita shumë të vështira, pasi ka kohë që në rrugë jozyrtare jemi vënë në dijeni të restaurimit të kullës së Prekë Calit. Kemi pritur dhe kemi premtuar se jemi gati të bëjmë gjithë dokumentacionin ligjor dhe të miratojmë projektin e një grupi shqiptarësh tanë në diasporë. Por, askush nuk ka ardhur me një kërkesë ligjore. Është spekuluar, duke kaluar përmbi bashkinë, pasi matrapazët duket se kanë matur ndjeshmërinë tonë për figurën legjendare të Prek Calit. Kanë menduar se çfarëdo të ndërtojnë privatisht dhe jashtë çdo ligji e morali, ne do heshtim, duke u lënë atyre hapësirë që të ndërtojnë dhe ta përdorin për vete emrin e banesën e Prek Calit për biznes. Ky do ishte krim, që nuk do na e falnin shekujt", tha kreu i bashkisë.