Beteja kundër Bashës, Topalli: Asnjë hap prapa
"Akti me të cilin po tradhton PD- në"
Topalli sulmoi sërish dje kryetarin e PDsë, Lulzim Basha, për lëvizjen e tij më të fundit politike për reformën zgjedhore. Ishnënkryetarja e PD- së për më shumë se një dekadë ka analizuar kushtet e Bashës, duke i cilësuar si hipokrizi dhe tradhti ndaj PD, duke e nisur nga kërkesa e tij e parë për reformimin e sistemit politik. "Sistemi politik reformohet përmes reformës së klasës politike, dmth., të partive politike, që do të thotë përmes rritjes së demokracisë, të zbatimit të statutit; gjëra të cilat nuk kanë ndodhur gjatë kësaj periudhe në të cilën ka drejtuar Lulzim Basha", tha Topalli për "Vizion Plus". Ajo shprehet kundër aplikimit të teknologjisë në zgjedhje, duke i kërkuar Bashës të sqarojë demokratët se çfarë fshihet pas këtij kushti të përmendur disa herë gjatë këtij viti nga Basha. "Herën e parë e filloi si betejë, bëri gjoja, ngriti çadrën, tradhtoi çadrën, bëri marrëveshjen dhe humbi zgjedhjet me minus 230 mijë vota. Tani pyetjet që ai duhet t'u sqarojë demokratëve janë: e para, ai me votimin elektronik kërkon që të heqë kontrollin politik, kontrollin e demokratëve mbi procesin zgjedhor? Është pyetje e rëndësishme që ua ka borxh demokratëve. Gjë që do të thotë se ai nuk i beson sistemit të kontrollit partiak, por u beson firmave private, qoftë kjo e Beqjas apo kunatit? Është pyetja e dytë, të cilës ai duhet t'i kthejë një përgjigje. Dhe e treta, do të vazhdojë ai kundër të gjithë komunitetit ndërkombëtar që dëshmojnë dështimin e një sistemi të tillë në vende të tjera, edhe të kontinenteve të tjera, edhe brenda kontinentit tonë, si dikur Enver Hoxha, që dikur me shpatë në dorë çante rrugën drejt socializmit?", shprehet Topalli. E pyetur nëse dorëzohet në betejën për të ringritur PD, kundër Lulzim Bashës, ajo deklaroi: "Jozefina Topalli nuk bën hapa prapa".