PS kërkon ulje të numrit të punonjësve të "vetingut": Strukturë e fryrë
Struktura e organeve të reja do të miratohet në Kuvend, në tetor
socialistë kërkuan dje ulje të numrit të punon jësve të organeve të reja të vetingut. Organet e reja të vetingut pritet të nisin punën në tetor, me dosjet e gjyqtarëve dhe prokurorëve. Por deri më 5 tetor, parlamenti duhet të ketë miratuar edhe strukturat e këtyre institucioneve. Kështu, dje në Komisionin e Ligjeve relatorja socialiste Klotilda Ferhati sugjeroi uljen e numrit prej 185 personash, veçanërisht për organin e komisionerëve publikë. "Edhe për Drejtorinë Ekonomike e të Burimeve Njerëzore ju propozoni të keni 25 punonjës. Nëse i referoheni Avokatit të Popullit, numri i tyre është 13", deklaroi Ferhati. "Si mundet që 40 për qind e një strukture të tillë, kaq e rëndësishme, ta përbëjë sektori i ndihmës, që do të thotë 25 vetë në 65 janë 40 për qind. S'ka mundësi të ketë 9 shoferë", replikoi deputeti i PS, Bashkim Fino. Ndërsa, kryetarja e Kolegjit të Apelimit, Natasha Mulaj u shpreh: "Këtu është reduktuar deri aty ku s'mban më. Nuk ka më reduktim për mendimin tonë. Ne jemi pro dhe mbrojmë strukturën, klasifikimin e pagave dhe gjithçka që kemi paraqitur këtu. Nuk ka tërheqje". "Kjo është absurde! Po ç'domethënë sekretari i përgjithshëm dhe sekretar. Pra, sekretari i përgjithshëm do ketë edhe një sekretar", tha më tej Fino. Ndërsa, deputeti i LSI- së, Nasip Naço u shpreh: "Është shumë e rëndësishme që ne t'i japim mundësi këtij komisioni të fitojë kohën e humbur", ndërsa Tahiri u shpreh: "Vetëm KLD dhe Gjykata e Lartë, pasuria e anëtarëve atje shkon gati 8 mld lekë. Ju më garantoni mua që do t'i hiqni nga puna këta gjyqtarë". Komisioni i Pavarur i Kualifikimit, sipas strukturës së prezantuar do të përbëhet nga 65 persona, ndërsa funksioni i tij konsiston në rivlerësimin e gjyqtarëve dhe prokurorëve. Ankesat e funksionarëve të sistemit të drejtësisë që do t'i nënshtrohen vetingut, shqyrtohen nga Komisioni i Posaçëm i Apelimit, që do të përbëhet nga 68 punonjës, ndërsa Komisionerët Publikë do të përbëhet nga 52 punonjës dhe është një hallkë e ndërmjetme midis dy institucioneve të lartpërmendura.